BETONG: Program Youth Unplugged 3.0 nya inisiatif nyikap nembiak napi jeman universiti tauka gawa ngambi ulih nyadi penyungkak pemansang nengeri Sarawak dudi hari.
Sapit Menteri Nembiak, Lumba enggau Pemansang Orang Dagang Sarawak ti mega Kaban Kunsil Nengeri (ADUN) Layar, Datuk Gerald Rentap Jabu madah, tuju program tu dikena ngansah pengelandik bala penyereta nengah ngambi bagi ba aktiviti beraban lalu meransang bala penyereta ngena pengelandik ba pengidup besehari-sehari sida.
Ku iya, program diatur Kelab Nembiak Negap Layar nengah sukung Opis Menteri Nembiak, Lumba enggau Pemansang Orang Dagang Sarawak tu dikena ngansah pengelandik entara penyereta nengah kerejasama ba aktiviti beraban lalu meransang bala penyereta ngena pengelandik ba pengidup besehari-sehari sida.
Nengah program tu mega, ku iya, bala penyereta diberi peneleba mutar pemar tating digital, narak pengeleda entara nembiak sereta nyadi pelasar sukung negap raban nembiak ngambi mansang.
Datuk Gerald madah munyi nya lebuh bejadi Pengawa Nutup Program 'Youth Unplugged 3.0 2026' di Dewan Gemilang, MRSM Betong kena Hari Minggu.
Iya mega ngelalau nembiak Pom Lima MRSM Betong ngambi ngadu perambu silik napi peresa SPM ke deka datai.
“Uji kitai berunding, SPM aja baka nanjak bukit ti tinggi. Lalu diatu kita meseti nusun strategi ngambi datai ba tuchung bukit,” ku iya seraya meri peransang ngagai nembiak.
Iya mega ngingatka bala nembiak senentang pemujur ukai semina bepanggai ngagai pengawa sida empu tang pangku pengawa apai indai enggau raban sekula mega nyadi elemen beguna dikena nyapai penyulut.
Ngenang Skim Pelajar Tinggi Pechuma (FTES) ari Perintah Sarawak, iya ngelalau nembiak pintar milih 64 kus ti disedia ba institusyen enggi perintah nengeri.
Ba pekara tu, iya meransang nembiak berundingka bidang strategik baka veterinar, aeroangkasa, pengelikun siber, teknologi pemakai enggau semikonduktor.
Iya mega nyebut inisiatif penumbuh Sarawak Semiconductor ti bejalaika pansik ba Cardiff ngena teknologi Gallium Nitride dikena ngasilka chip tan ari pengangat nipak pemansang industri digital global.
Pia mega, iya nyebut pengawa negap pelajar ba Betong enggau nambahka agi palan pelajar ti bisi diatu kelimpah ari Kolej Vokasional, MRSM Betong enggau SMK Datuk Patinggi Kedit nengah pengawa numbuh kampus tetap CENTEXS enggau perambu timpuh panjai iya nya ngaga Kolej Pom Enam di Betong.
Program diatur ari 27 Februari nyentuk 1 Mac 2026 ngaul 225 iku nembiak Pom 3, 4, 5 ti dipejalai ba MRSM Betong.
Nya alai, Datuk Gerald mega meri terima kasih ngagai Kelab Nembiak Negap Layar laban udah ngatur program ti meri pemaik tu kelebih agi ngagai nembiak ba Betong. - EDISI UKAS
