KUCHING: Gerempung Kontraktor Melayu Malaysia (PKMM) Pampang Sarawak beterima kasih ke saup Perintah Sarawak meri mesin ke dikena kontraktor menua tu lebih agi Bumiputera ngemujurka agi pengawa ngaga projek.

Yang Dipertua gerempung nya, Dato’ Ismail Suut madah, saup nya mandangka pengeransing perintah nengeri ke dipegai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg nyungkak pengulih kontraktor ngadu pengawa.

"Saup tu besai reti ba kami lalu enda kelalu bepanggai nyuwa ari orang bukai kelimpah nyungkak pengulih ngadu enggau nembu projek," ku iya madah.

Iya bejaku munyi nya ngagai media sepengudah ngatur penemuai basa ngagai Premier Sarawak di Kompleks Satria Pertiwi ditu, Hari Satu.

Dato’ Ismail ke mega Mandal Naib Presiden PKMM Malaysia madah, penemuai basa nya bela deka ngenegapka agi kaul strategik gerempung enggau perintah besai kelimpah berandauka kuing tuju industri di Sarawak.

Iya mega madah, randau maya nya bela bekaul enggau perambu ngaga begunan baru gerempung nya ba Jalai Sultan Tengkah ti disadang deka berengkah enda lama agi sepengudah nerima pemutus ari perintah nengeri.-EDISI UKAS