SEBUYAU: Loji ai baru di Ulu Sebangan disadang ulih tembu Julai tu ila ti deka mutar isu ai di Sebuyau enggau Sitak Samarahan.

Menteri Utiliti enggau Telekomunikasi Sarawak Dato Sri Julaihi Narawi madah, projek ke ulih ngundan ai lima juta liter sehari (MLD) nya deka nyaup loji ai di Batu Kitang, Kuching.

"Projek tu udah berengkah November taun siti tadi.

"Enti udah tembu, kitai deka bisi pun bepenatai bekal ai ke baru kelimpah ari Kuching," ku iya.

Iya nerangka pekara nya maya program Nemuai Ramadan enggau Tanggung Pengawa Rama Korporat (CSR) ke diatur Opis Menteri Utiliti enggau Telekomunikasyen Sarawak enggau Opis Ekonomi Digital Sarawak (SDEC) ditu, Hari Satu.

Kelimpah ari nya iya ke mega Kaban Kunsil Nengeri (ADUN) Sebuyau madah, langgur ngaga loji ai 40 MLD di Sebuyau mega benung diserenih ke ulih mutar penanggul bekal ai di menua nya.

Ba pengerami nya, MUT enggau SDEC bisi nyua pemeri ngagai 60 penerima ari Kampung Menek, Kampung Lutong enggau Kampung Arus Melayu.

Kelimpah ari nya, 30 iku nembiak mit bela nerima pemeri serimbai Hari Raya Aidilfitri ke deka disambut enda lama agi. -EDISI UKAS