KUCHING: Ubah klimet ukai agi isu abstrak tang tau ngeruga penumbuh ekonomi, pengentap fiskal enggau pengelantang rama menua Malaysia.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, rikod ke diatu mandangka ubah klimet mai risiko material ba ekonomi menua.
"Ampuh bah, tanah tusur enggau gaya hari ekstrem endang udah ngeruga komuniti, infrastruktur lalu mai pengerugi," ku iya.
Iya bejaku munyi nya maya bejadi Subnational Climate Change Institutional Assessment (CCIA) ditu, Hari Dua.
Datuk Patinggi Abang Zohari mega madah, Sarawak enggau Sabah bisi kampung ke besai sereta ngembuan landskap tinggi karbon ke ulih nyaup kuing tuju pengawa bekaul klimet menua.
Ku iya, tu deka nentu pengawa ngatur tanah enggau pun penatai pengeraja asal bisi pengulih ngemujurka pengawa mutar penanggul klimet Malaysia.
Bela datai Sapit Premier Sarawak Datuk Amar Douglas Uggah Embas enggau Datuk Amar Prof Dr Sim Kui Hian, Speaker Kunsil Nengeri Sarawak, Tan Sri Datuk Amar Mohamad Asfia Awang Nasar, Menteri ba Opis Premier Sarawak, Dato Sri John Sikie Tayai, Sekretari Perintah Sarawak, Datuk Amar Mohamad Abu Bakar Marzuki, Sapit Menteri Kuasa enggau Pemeruan Rampa Menua Sekitar Sarawak, Datuk Dr Hazland Abang Hipni enggau Tuai Raban Ekonomi Bank Dunya bagi Malaysia, Apurva Sanghi. -EDISI UKAS
