KUCHING: Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau Toh Puan Datuk Patinggi Fauziah Mohd Sanusi nerima penemuai basa Duta Besai Itali ke Malaysia Raffaele Langella ditu, Hari Dua.

Penemuai basa nya dikena madah ke diri udah dichiri nyadi Duta Besai ke Malaysia seraya deka ngenegapka agi kaul diplomatik menua Itali enggau Sarawak.

Maya nya Tun Pehin Sri Dr Wan Junaidi enggau Raffaele Langella besilih penemu bekaul macham pekara nyengkaum sektor kuasa gadung, dagang, pelajar tinggi, biodiversiti enggau isu rampa menua.

Duta Besai Itali nya bela madah ke pengingin industri besai menua sida semampai deka nyadi bakih strategik Sarawak lebih agi nyukung juluk ati Sarawak nyadi hab kuasa beresi ba rantau Asia Tenggara.

Tun Pehin Sri Dr Wan Junaidi maya nya mega bisi nerang pengulih Sarawak ngasilka hidrogen gadung enggau kuasa ulih dikena baru seriris enggau tuju pemansang meruan nengeri.

Bela dirandau iya nya bekaul pengulih nempa kerejasama ba bidang budaya enggau dagang temuai kelimpah pengawa matak mayuh agi temuai ari Itali nemuai ke Sarawak.

Sama bisi datai maya nya Direktor Opis Kandang Menua Sarawak, Opis Menteri Luar Malaysia Sarawak Dato Fenny Nuli. -EDISI UKAS