Aum Teknikal MTPMA63 Berati Isu Empai Diputar Ba MA63
KUALA LUMPUR: Aum Komiti Teknikal nengah Kaunsil Pengatur Sempekat Malaysia 1963 (MTPMA63) ngempung penemu ari sida ke bekaul pekara enggau isu ke empai diputar ba Sempekat Malaysia 1963 (AM63).
Aum ke diatur ba begunan parlimen nya betuaika Sapit Menteri Besai Datuk Amar Fadillah yusof, ke nyadi Chairman Komiti Teknikal MTPMA63.
Iya madah, aum nya nyadi awak dikena berati penemu ari opis menteri enggau agensi perintah besai kelimpah perintah nengeri Sabah enggau Sarawak nyengkaum nentu kuing tuju enggau chara ke engkeman dikena mutar isu ke empai diaduka.
”Bisi tiga keretas penerang dikenataika Opis Menteri Pengerai, Opis Menteri Pelajar enggau Bagi Pekara Sabah Enggau Sarawak, Opis Menteri Besai,” ku iya nengah facebook.
Perintah Besai maya nya diarika Menteri Ba Opis Menteri Besai (Sabah Enggau Sarawak), Datuk Mustapha Sakmud enggau beberapa iku menteri ke bukai.
Perintah Sarawak diarika tiga iku sapit Premier Sarawak iya nya Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Prof Dr Sim Hui Hian.
Lalu sabah, diarika Sapit Kepala Menteri Iya Nya Datuk Seri Dr Jeffrey G Kitingan, Datuk Seri Masidi Manjun enggau Datuk Ewon Benedick. -EDISI UKAS
