KUCHING: Konflik ke nyadi ba Timur Tengah maya tu disadang tau ngeruga industri dagang temuai Sarawak nyengkaum Rainforest World Music Festival (RWMF) ke deka diatur Jun tu ila.

Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah madah, pekara nya nyangka deka amat nyadi nyema konflik nya majak nyadi ti nanggul pejalai temuai antarabansa.

Ku iya, Sarawak nerima temuai pemadu mayuh ari menua Eropah baka Jerman enggau United Kingdom.

"Nyema konflik tu nyadi kelalu lama, tu bela deka mai penanggul ngagai kitai nyengkaum Rainforest World Music Festival bulan Jun ila.

"Kitai enda nemu, nyangka mayuh enda nyadi nemuai laban Jun enda lama agi," ku iya madah.

Iya bejaku munyi nya ba aum media Lan Berambeh Sungkei Belia 2026 ditu, Hari Empat.

Dato Sri Abdul Karim mega madah, semua ngarapka pengidup ti lantang, bela ngenggaika konflik nyadi.

Iya madah, tiap bengkah menua patut nyaga pemanah kaul lalu bebasaka pangan diri sereta ngemeratka pengelantang rayat mayuh.

"Kitai enggai meda penusah nyadi. Kitai deka idup ba menua ke likun enggau pangan diri," pia ku iya.

Berebak enggau nya, iya ngarap rayat Sarawak ba menua ke benung bisi konflik ngambi semampai nyaga pengelikun diri.

Bela datai ba aum media nya, Sapit Menteri Raban Nembiak, Lumba enggau Pemansang Orang Dagang Sarawak Datuk Gerald Rentap Jabu enggau Datuk Dr Ripin Lamat.-EDISI UKAS