MUPONG: Peranak ba semilan rumah panjai di Mupong Tengah diatu ngasai jalai baru pengudah Program Transfomasyen Menua Pesisir (RTP) nuju rumah panjai nya nengah Renggat Keterubah tembu digaga.

Sapit Menteri ba Opis Premier Sarawak (Pekara Korporat, Pemadah enggau UKAS) ti mega Kaban Kunsil Nengeri (ADUN) Semop, Datuk Abdullah Saidol ba pengawa nyerah taba projek tembu nya kena Hari Lima madah kediri tepantup ati laban projek nya tembu nitih taga lalu meri pemaik ngagai peranak lokal.

Datuk Abdullah mega madah ke Renggat Kedua projek nya ti nyerangkung melakin jalai deka dipejalai dudi hari pengudah bulih pemendar ari raban bekaul.

Pengawa ngaga jalai sepanjai 600 meter nya ukai semina nyamin pengelantang peranak tang mega nukar jematan kayu ti udah lama ditengah nyadi jalai besai, ngujungka jalai nya likun agi enggau muntang diakses.

Projek nya dipejalai ngena agih belanja Perintah Sarawak ungkup sitak DUN Semop beungkus RM400,000 lalu Opis Parit enggau Entali Ai (DID) Bagi Menua Sarikei nyadi agensi pengatur.

Projek nya belabuh dipejalai kena November 2025 lalu tembu digaga kena Februari 2026 nitih taga ti ditetap.

Sama datai ba pengawa nyerah taba projek iya nya Penulung Injinir Perintah DID Sarikei Abd Rashid Abd Rahman sereta Penulung Pegawai Tadbir Opis Pelilih Meradong, Hana Safea Tegku. - EDISI UKAS