BARIO: Pekit Lumba Balapan enggau Padang Sekula Primari (SK) Long Lellang ukai semina aktiviti sekula ninting taun tang mega nyadi pelasar beguna nempa pemanah ulah, disiplin sereta semangat kerejasama entara nembiak.

Sapit Menteri ba Opis Premier Sarawak (Pengereja Kasar, Imigresyen enggau Patau Projek) ti mega Kaban Kunsil Nengeri (ADUN) Mulu, Datuk Gerawat Gala madah, pengawa ransing ngambi bagi ba aktiviti lumba ulih nempa pemanah ulah nembiak kenyau ari sekula.

Ku iya, nengah aktiviti lumba, bala nembiak ulih belajar pemesai reti pengeransing, semangat belumba, pengeliat ati sereta bekerejasama nyadi siti tim.

“Menang tauka alah nya endang udah adat. Pekara pemadu beguna iya nya pemerani nguji, ransing sereta pengeran ngemanah diri,” ku iya maya bejadi Pekit Lumba Ninting Taun SK Long Lellang ditu, kena Hari Lima.

Penatai iya enggau raban diambat Kepala Pengajar SK Long Lellang, Prisca Kula, bala pengajar, tuai komuniti sereta peranak lokal ti bela ngerichah pengawa nya.

Nambah ke nya, Gerawat ngingatka bala nembiak senentang pemesai guna pelajar nyadi kunchi nempa pengidup ti menyana agi.

Iya madah, Perintah Sarawak diiring Premier Sarawak keran nentuka anak nengeri tu bulih peluang pelajar ti manah agi nyengkaum nyendia pelajar pechuma ba palan pelajar tinggi enggi perintah nengeri.

Ku iya, inisiatif nya nentuka anak Sarawak nyengkaum ari menua pesisir enggau menua ulu baka Long Lellang, bisi peluang sebaka nampung pelajar ngagai tikas universiti lalu enda ditating ungkus belajar ti besai.

“Inisiatif tu mega mandangka pengeran perintah nengeri ngemansang modal mensia laban pemansang Sarawak bepanggai ba jari rebak diatu,” terang iya.

Berebak enggau nya, iya meransang bala nembiak belajar bebendar, bebasa ke pengajar enggau apai indai sereta terus nyapai penyulut ba bidang akademik enggau lumba.

Iya mega andal ke mayuh agi nembiak nyulut ari SK Long Lellang deka ditempa dudi hari seraya ngemegah nama sekula, komuniti enggau nengeri Sarawak.

Pengawa bejadi pekit nya mega richah enggau gintir rumah lumba sereta mayuh achara balapan enggau padang ti dipasuk bala nembiak sekula nya. - EDISI UKAS