LAWAS: Sepenyampau 800 kuntina bubur lambuk disadung ngagai peranak Kampung Baru Sundar sereta mensia mayuh ti betengahka endur nya nengah Program Nyadung Bubur Lambuk diatur Parti Pesaka Bumiputera Bersatu (PBB) Kampung Baru Sundar Pampang Bukit Sari kena Hari Lima.

Program ti diatur di Kampung Baru Sundar nya dipenyadi Konsilar Awang@Ibrahim Ahmad, Sekretari Parti PBB Pampang Bukit Sari ti ngari ke Sekretari Politik Premier Sarawak, Awangku Jinal Abedin Dato Pengiran Jawa.

Ku iya, pengawa ngatur program nya dikena ngaul komuniti seraya ngerapit kaul entara peranak dia kelebih agi sepanjai bulan Ramadan.

Ku iya, pengawa bekunsi jereki baka nyadung bubur lambuk ukai semina mandangka semangat begulai tang mega meransang komuniti terus nyadung bantu ngagai raban ti bekaul.

“Bulan Ramadan ngajar kitai gerah jari lalu bekunsi enggau orang bukai. Taja pemeri tu mimit tang nya dikearap ulih mai pengaga ngagai sida ti nerima nya,” ku iya.

Iya mega muji semangat beripai peranak genturung pendiau ti beguna nyendia enggau nyadung bubur lambuk ngagai komuniti dia.

Ku iya, semangat begulai enggau budaya besaup baka tu patut ditampung ukai semina sepanjai Ramadan tang mega mekuh kaul komuniti dudi hari.

Program nya mandangka tradisyen komuniti ti terus ngemeran pengawa bekunsi pemakai buka puasa enggau orang berimbai pendiau sereta ngerami malam tujuh likur sepanjai Ramadan.

Sama datai, Tuai Pati PBB Kampung Baru Sundar, Bakar Jidin; Penghulu, Hantin Nordin; Tuai Genturung Pendiau, Luagan Sundar Mohidin Matzin sereta Konsiler Maidie Kassim.- EDISI UKAS