KUCHING: Perintah Sarawak terus negap pengawa mantu rayat sereta ngeranchak ekonomi nengeri lebuh ngelanchar Bantu Barang Diguna Sarawak (SKAS) 2026 nengah agih belanja sepenyampau RM640 juta.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, inisiatif nya ukai semina dikena mantu rayat bebeli ke barang tang mega nyungkak ekonomi enggau nambah peminta domestik.

Ku iya, belanja rayat ti nambah deka ngemansang aktiviti dagang lalu meri pemaik ngagai ekosistem ekonomi lokal.

"Lebuh peminta domestik nambah, dagang deka terus bepusin lalu meri pemaik ngagai rayat sereta sistem ekonomi kitai.

“Tu mai reti kitai nambah RM640 juta ke dalam ekonomi nengeri dikena nyaup rayat ngambi sida ulih bebeli ke barang enggau ngeranchak baru pejalai ekonomi, " ku iya.

Iya madah munyi nya lebuh bejadi Pengawa Ngelanchar SKAS 2026 Renggat Sarawak ba Bazar Ramadan Stutong, ditu kena Hari Enam.

Iya mega madah ke SKAS ti dipejalai kenyau ari taun nyin tadi ke mega intervensyen terus Perintah Sarawak dikena nyaup rayat napi belanja idup nambah ketegal rega barang niki.

Ku iya, ba taun keterubah program nya, Perintah Sarawak udah ngagihka belanja RM480.2 juta enggau lebih ari 888,000 penerima.

Berindik ari empas positif ti dibantai, atur nya ditegap taun tu nengah agih belanja RM539.8 juta, ngaul RM179.6 juta ungkup pengawa ngagih renggat keterubah, RM179.6 juta ungkup renggat kedua enggau RM180.6 juta ungkup renggat ketiga.

Pia mega, penyampau bantu nya ditambah ngagai RM950 setaun ungkup kategori ruang bilik, RM500 setaun ungkup orang tuai nadai orang sebilik sereta RM300 setaun ungkup kategori bujang.

"Semua bayar deka dipasuk chara tiga renggat ngagai akaun S Pay Global (e-kerepai) penerima belabuh 10 Mac tu dikena ngemuntang raban Islam besikap ngintu Hari Raya.

"Renggat kedua deka dipejalai 25 Mei serimbai pengerami Gawai Dayak seraya renggat ketiga kena 10 November tu ngambi nyaup besikap anak bepungkal sekula," ku iya baru.

Ba pengawa nya, Datuk Patinggi Abang Zohari mega bejadi simbolik ngelanchar enggau nyua replika bantu SKAS ngagai enam pengari penerima ari kategori orang tuai nadai orang enggau sebilik, ruang bilik sereta orang bujang.

Sama datai iya nya Sapit Premier Sarawak Datuk Amar Profesor Dr Sim Kui Hian, Sekretari Perintah Sarawak Datuk Amar Mohamad Abu Bakar Marzuki, Sapit Menteri Kuasa enggau Pemeruan Rampa Menua Sarawak Datuk Dr Hazland Abang Hipni, Sapit Sekretari Perintah Sarawak (Perambu Ekonomi enggau Pemansang) Dato Sri Dr Muhammad Abdullah Zaidel, Direktor Unit Perambu Ekonomi Sarawak Datu Ir Ts Awang Mohammad Fadillah Awang Redzuan, tuai opis enggau temuai dipebasa bukai.

Ke penerang, penerima SKAS nyerangkung kategori ruang bilik bepenatai pemisi RM5,000 enggau ke baruh, individu bujang bepenatai pemisi RM2,500 enggau ke baruh sereta orang tuai nadai orang enggau diau tauka anak nengah penatai pemisi RM5,000 enggau ke baruh.

Pengawa ngagihka bantu deka ditampung nengah S Pay Global ungkup bebeli ke pemakai ba 2,249 pasar raya enggau kedai ti ngambi bagi ba selampur Sarawak.

Bantu belanja nya ulih dikena sepanjai taun tu lalu status ulih dipeda nengah aplikasyen S Pay Global tauka link, https://sarawak.gov.my. -EDISI UKAS