119 Penerima Nerima Pampas RM6.5 Juta Ungkup Projek AgriHub Lubok Punggor
GEDONG: Sepenyampau 119 penerima nerima chek pampas sepenyampau RM6.5 juta dikena bejalaika projek pemansang AgriHub Lubok Punggor ti disadang negap sektor betanam betupi moden ba Gedong.
Pengawa nyua chek pampas nya mujur dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg serimbai Pengawa Buka Puasa Pelilih Gedong ti diatur ba Masjid Al-Khawtar, ditu kena Hari Minggu.
Pengawa nyua pampas nya mandangka komitmen Perintah Sarawak nentuka pejalai projek pemansang ulih lanchar dipejalai seraya nyaga pengelantang pengempu tanah ti ngambi bagi ba pemansang AgriHub nya.
Projek pemansang AgriHub Lubok Punggor ngaul ngaga taba gudang enggau bengkel kereban, pegung sereta ngaga enggau nyeruri sistem parit enggau entali ai dia.
Ba pengawa nya, raban asnaf mega nerima pemeri lebih 10 penerima ti ngari ke urung 300 penerima bukai nerima bantu RM10,000 ari Opis Premier Sarawak, RM50,000 ari Kaunsil Pemansang enggau Pengintu Tanah (LCDA) sereta RM30,000 ari Bank Rakyat.
Pia mega, sepenyampau RM61,000 diagih ngagai 26 penerima chek nengah agih belanja Projek Mit Pemansang Menua Pesisir (MRP) ti ngaul pengari masejit enggau surau dia dikena nyukung mayuh aktiviti pengarap enggau komuniti.
Premier mega bisi sembiang fardu Maghrib sereta buka puasa begulai enggau mensia mayuh serimbai bulan Ramadan.
Sama datai, Sekretari Perintah Sarawak, Datuk Amar Mohamad Abu Bakar Marzuki, Sapit Sekretari Perintah Sarawak (Perambu Ekonomi enggau Pemansang), Dato Sri Dr Muhammad Abdullah Zaidel, Sapit Menteri Infrastruktur enggau Pemansang Penyangkai Kapal Sarawak, Datuk Ir Aidel Lariwoo, Penyanding Penemu (SME) Opis Menteri Dagang Antarabansa, Industri enggau Pengawa Meranak Puku Sarawak (MINTRED), Dato Sri Mohd Naroden Majais, Kaban Parlimen Batang Sadong, Rodiyah Sapiee, Kaban Kunsil Nengeri (ADUN) Simunjan, Awla Dris sereta temuai bukai. – EDISI UKAS
