PAKAN: Agih belanja RM120 juta ngagai Unit Pekara Pengarap Bukai (UNIFOR) ungkup taun 2026 ngayanka Perintah Sarawak nyata nyukung pemansang rumah sembiang ukai Islam sereta sekula mission di nengeri tu.
Kaban Kunsil Nengeri (ADUN) Pakan, Tan Sri William Mawan Ikom madah, ari penyampau nya, RM90 juta diungkupka ngaga enggau nyeruri rumah sembiang ukai Islam seraya RM30 juta da diberi mantu pemansang sekula mission.
Ku iya, agih belanja nya ngayanka Perintah Sarawak keran nentuka pengelantang pupu pengarap di nengeri tu terus dijaga.
Iya nibar ke jaku nya lebuh bejadi Dewan Tetutup Gerija Misi Evangelikal Borneo (BEM) Babai ti tembu digaga ngena ungkus RM200,000 ditu, Hari Enam.
Ngenang pekara bekaul, iya madah ke sepenyampau RM4.2 juta belanja UNIFOR udah diberi ngagai 21 gerija di sitak Kunsil Nengeri (DUN) Pakan ari 2019 nyentuk 2025.
Ku iya, bantu nya udah ngemujur bemacham projek ngaga enggau nyeruri rumah sembiang dikena nangkup peminta komuniti menua nya, lalu nambah perengkaguna dikena sida ngatur aktiviti pengarap enggau lantang agi.
Berebak enggau nya, Tan Sri William Mawan nyemetak madah ke pengelantang entara pupu pengarap patut terus dijaga ba rayat pupu bansa di Sarawak.
“Kenyau Malaysia ditumbuh, Sarawak nadai kala netapka pengarap rasmi ba tikas nengeri. Nya alai, semangat Segulai Sejalai patut terus ditarak ngambi rayat pupu bansa enggau pengarap ulih idup lantang sereta nyeliah sebarang penusah pambar.
“Rayat di nengeri tu mega patut nulak sebarang ulah ekstremisme lalu terus ngemeran ulah bebasa dikena ngetan pengelikun ti udah lama diasai di Sarawak,” ku iya.
Iya mega minta ngambi peminta projek di baruh UNIFOR dianjung tumu agi nentuka proses ngemendar enggau meri belanja ulih diatur lanchar agi.
Ku iya, taja peminta tau digaga nengah tali arus, tang orang ti minta enda patut neju chara nengah pengari rayat nentuka tetiap peminta ditusun berurun agi sereta nyeliah ari ditikal pulai ngagai raban UNIFOR.
Nambah ke nya, ku iya, tetiap peminta mega patut disempulang enggau perambu projek ti chukup nyengkaum bukti ngena agih belanja sebedau tu tauka ripot status projek ti benung digaga.-EDISI UKAS
