PADAWAN: Pelajar nyadi kunchi ngemansangka diri enggau ngerandang mayuh agi peluang ngulihka pengidup menyana.

Sapit Menteri Pengangkut Sarawak (Langit enggau Jalai) ti nyadi Kaban Kunsil Nengeri (ADUN) Mambong, Datuk Dr Jerip Susil madah, rebak biak patut terus ransing ngiri penemu sekali ke nengah akademik tauka latih pengelandik ngambi tetapi ke pemar dunya kereja ti majak kompetitif jeman diatu.

“Enda patut ngetu belajar taja kita udah mujur ba kereja laban penemu seruran ngerembai nitih ubah jeman,” ku iya

Iya nibar ke jaku nya ba mua mayuh rambau pengawa nangguh Program BIPEROH Tertiary Education Admission and Career Guidance 2026, ditu, Hari Minggu.

Program diatur Serakup BIPEROH Kuching nya digulu 49 nembiak sekula lepas Sijil Pelajaran Malaysia (SPM) enggau Sijil Tinggi Persekolahan Malaysia (STPM) ari lapan genturung pendiau di sitak BIPEROH.

Tuju program nya meri penemu ngagai bala nembiak lepas sekula pasal pilih nampung pelajar sereta peluang kereja pengudah abis sekula.

Sekumbang program nya, bala penyereta ngulu sekeda pengawa belunsi penemu nyengkaum licha peransang ari Profesor Madya Dr Romano Ngui ari Universiti Malaysia Sarawak (UNIMAS).

Bala penyereta mega diberi penerang pasal peluang sekularship enggau bantu belanja ari pengari Yayasan Sarawak kelimpah sesyen ngena pejuluk What Next After SPM/STPM dikenatai pengari Universiti Teknologi Sarawak (UTS).

Kelimpah ari nya, sesyen bekunsi peneleba pemujur ari Profesor Dr Frank Kiong dari I-CATS Kuching sereta penerang pasal peluang latih pengelandik enggau program Pelajar enggau Latih Teknikal enggau Vokasional (TVET) ari pengari Centexs Santubong mega bisi diatur.

Sama datai, Pegawai Tadbir Nguasa Opis Pelilih Mit Padawan, Julius Scott Sapong enggau Presiden Serakup BIPEROH Kuching, Penghulu Richard Daho. -EDISI UKAS