MIRI: Bup Uncharted Waters (2025 Edition): The Memoirs of C. Hudson Southwell dilanchar nyadi lambang ngingat ke legasi siku tokoh misionari ti besai pangku pengawa ngerembaika Borneo Evangelical Mission (BEM) di Sarawak.

Pengawa diatur Gerija Borneo Evangelical Mission (BEM) Pelita nya udah dipenyadi Sapit Menteri ba Opis Premier Sarawak (Pengereja Kasar, Imigresen enggau Matau Projek) ti nyadi Kaban Kunsil Nengeri (ADUN) Mulu, Datuk Gerawat Gala di BEM Pelita Miri kena Hari Minggu.

Sama datai, Sekretari Besai BEM Sarawak ngari ke Presiden BEM Sarawak, Elder Stanley Sigar Arun, penyunting enggau pengeluar bup nya Rod J. Blair, Chairman BEM Pelilih Miri Pastor Luther Sakai, bala pastor enggau elder gerija sereta bala tuai komuniti.

Lebuh bejaku bejadi pengawa nya, Datuk Gerawat madah ke bup nya dilanchar ukai semina mantai kenang sejarah aja, tang siti basa ngagai pengidup enggau pengiruh siku misionari ti ngelempaika pengidup iya ba jari Tuhan.

Ku iya, tokoh misionari C. Hudson Southwell ngejang ari menua diri empu di Australia ungkup bejalai neresa menua ulu Borneo pengujung taun 1920-an, kelebih agi ba komuniti Orang Ulu di Baram.

Ku iya, pejalai Southwell mayuh penguji enggau penusah nyengkaum gawa dalam kampung ba menua ulu lebuh jeman pegai Jepun di Sarawak ke alai iya ditan di Kem Batu Lintang di Kuching.

“Taja napi mayuh penguji, pengarap iya ke Tuhan tetap tegap lalu pengawa iya meri empas ngagai peranak dia sereta pengerembai gerija di Sarawak,” ku iya.

Iya mega madah, BEM diatu deras ngerembai enggau 713 gerija rejista lalu lebih 110,000 kaban di Sarawak kelimpah ngerembai ke Sabah sereta Semenanjung Malaysia.

Berebak enggau nya ku iya, Perintah Sarawak ngaku pemesai guna gerija nempa komuniti ti likun, mansang enggau lantang.

Ku iya, nengah Unit Pekara Pengarap Bukai (UNIFOR), perintah nengeri udah ngagihka belanja dikena mantu institusyen pengarap kelimpah Islam.

“Kenyau UNIFOR ditumbuh taun 2017 nyentuk diatu, Perintah Sarawak udah ngagihka urung RM565 juta dikena nyaup pemansang rumah sembiang enggau institusyen pengarap.

“Ari penyampau nya, RM70.9 juta diagih ngagai gerija BEM dikena ngemujurka 639 projek pemansang,” terang iya.

Bup nya dilanchar mega engkeman ba maya ngintu genap taun ke-100 BEM Sarawak ti ditaga November 2028.-EDISI UKAS