MIRI: Semangat penyerakup enggau pengelantang entara pengarap terus nyadi pun pengering rayat Sarawak ti datai ari pupu bansa enggau budaya.

Menteri Pengangkut Sarawak ti mega Kaban Kunsil Nengeri (ADUN) Senadin, Dato Sri Lee Kim Shin madah, hari besai baka Taun Baru China diintu ukai semina tradisyen raban bansa China aja, tang ngerapit kaul enggau negap penyerakup rayat menua tu.

“Polisi tu ngayanka prinsip Sarawak ti bebasa ke pengelain budaya, ulih milih pengarap enggau nentuka tetiap pengarap ulih ngerembai likun enggau lantang,” ku iya.

Iya nyebut jaku nya lebuh ngulu Gempuru Taun Baru China diatur Serakup Buddha Miri Thian Chun Tien diatur di Tudan, kena Hari Minggu.

Ku iya, gerempung pengarap bejalaika pangku pengawa besai nempa komuniti lantang ari narak pemanah ulah baka pengasih, pemintar enggau bebatak asur.

Berebak enggau nya, iya madah ke Sarawak seruran ngemeratka pengelantang entara pengarap enggau pengelain budaya ti nyadi aset berega ngagai nengeri tu.

Iya mega madah ke Perintah Sarawak nengah Unit Pekara Pengarap Bukai (UNIFOR) seruran nyukung pemansang gerempung pengarap ari nyendiaka agih belanja ngaga, ngintu enggau nyeruri fasiliti rumah sembiang,

Iya nerang, gerempung pengarap ulih bejalaika pangku pengawa nemban agi meri servis ngagai komuniti nengah inisiatif nya.

Iya mega ngelalau, gaya dunya dudi hari mayuh pemar enggau penyarut, nya kebuah pengelikun enggau penegap di Sarawak patut seruan dijaga begulai.-EDISI UKAS