BINTULU: Mayuh agi indu diperansang ngaul diri ba politik enggau nyadi tuai menua nentuka sada enggau peneka sida terus diberi perati ba pengawa ngaga polisi.

Kaban Kunsil Nengeri (ADUN) Tanjong Batu ti mega Chairman Parti Sa’ati Rayat Sarawak (SUPP) Bintulu, Johnny Pang Leong Ming madah, majak mayuh indu ngaul diri ba politik seriris enggau pemansang jeman.

Ku iya, indu ti ngaul diri ngaga pemutus beguna endar nentuka pekar abekaul indu ulih dikerandau enggau diputar meruan agi.

“Seriris enggau pemansang jeman, penemu pemesai guna politik ba orang indu majak nambah.

“Majak mayuh indu diatu chakah ngaul diri ba pengawa perintah enggau politik, lalu tu nunjukka indu majak mayuh ba pengawa tu,” ku iya.

Iya nyebut pekara nya lebuh Pengerami Ngintu Hari Indu Antarabansa diatur Indu SUPP Pampang Bintulu ditu, Hari Minggu.

Ngenang pekara nya, ku iya, mayuh agi indu sama enggau ngaga pemutus sereta ngatur pengawa, dia isu bekaul indu ulih diberi perati silik agi.

Berebak enggau nya, Johnny Pang mega meri terima kasih ngagai komiti indu SUPP Bintulu ti udah kiruh ngatur program nya dikena ngenang jasa indu dalam komuniti.

Iya madah, indu ukai semina besai pangku pengawa ba mayuh pengawa pemansang aja, tang nyadi tiang pemun bar uang bilik ari pementas enggau penyiru iya ngintu ruang bilik.

Pengerami sehari nya richah enggau pengawa ngirup lemai sereta sekeda aktiviti bukai dikena ngerami indu ti bisi datai serimbai ngintu Hari Indu Antarabansa.

Nambah ke nya, 300 pating bungai rose diberi kelai ngenang jasa raban nya.-EDISI UKAS