SEMATAN: Program Kembara UKAS 2026 Demi Rakyat bekejang ba Kilometer 0 Telok Melano kena Hari Satu, kelai pejalai komunikasyen strategik neresa menua pesisir enggau sekeda endur pemansang besai di Sarawak dipejalai ngaul urung 1,750 kilometer penyauh.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, program nya nyadi jematan komunikasyen entara perintah enggau rayat ba renggat baruh.

Ku iya, program nya ukai semina nerang penerang bekaul pengawa enggau polisi perintah aja, tang nyadi peluang ngelala isu enggau peminta rayat menua.

“Aku ngarap ukai semina nerang pengawa perintah aja, tang enti ulih program tu dikearap ulih nyadi pelasar ngelala isu ti bisi nyadi.

“Ambi ke chunto ba Telok Melano pengarap komuniti ditu ngambi mayuh agi palan pematak dagang temuai lalu engka Pasar Sematan ulih digaga moden agi,” ku iya.

Iya nyebut pekara nya lebuh bejadi pengawa flag off Kembara UKAS 2026 Demi Rakyat di Kilometer 0 Telok Melano, ditu Hari Satu.

Iya madah baru, entara isu ti bela dibantai sekumbang pejalai matau menua nya nyengkaum bekaul bungkur arus telekomunikasyen, kelimpah meda gaya pejalai pemansang ba menua pesisir.

Kembara UKAS 2026 Demi Rakyat diatur ari 9 nyentuk 21 Mac nyadi inisiatif komunikasyen strategik dikena negap pengawa nerang polisi enggau inisiatif pemansang Perintah Sarawak ngagai rayat ba selampur nengeri.

Program pejalai komunikasyen nya belabuh di Telok Melano, Tanjung Datu lalu deka tembu di Lawas, ngaul pejalai neresa sekeda kandang menua tebing tasik enggau palan pemansang besai di Sarawak.

Tuju inisiatif nya nambah pemereti ati rayat ngagai polisi enggau agenda pemansang perintah nengeri kelimpah negap kaul entara perintah enggau rayat menua, kelebih agi ba kandang menua pesisir.

Kembara UKAS 2026 mega meri perati ngagai timbal penemu rayat ba bemacham inisiatif Perintah Sarawak.

Sama datai, Direktor UKAS Awang Putrayusrie Awang Redzuan, Sapit Tuai Polis Pelilih Lundu DSP Mordani Tanin, Sekretari Politik Premier Sarawak Abang Abdul Aziz Abang Draup, Pegawai Tadbir Sarawak Opis Pelilih Lundu, Monalissa Mariah Brain, Pegawai Tadbir Sarawak, Opis Pelilih Mit Sematan, Mohd. Ameerullah Roslan, bala pegawai kanan UKAS, bala tuai komuniti enggau bala bukai.-EDISI UKAS