KUCHING: TPr Wan Sufian Wan Mustapha udah dichiri nyadi Sapit Sekretari Mendam Opis Menteri Pengeraja Asal enggau Pemansang Mengeri Sarawak (MUDeNR) nyilih Hairani Mohamad Ismail.

Pengawa nyerah pangku pengawa entara Hairani enggau TPr Wan Sufian udah diatur di Wisma Sumber Alam sereta dikemata Sapit Premier Sarawak, Datuk Amar Awang Tengah Ali Hasan kena Hari Satu.

Berebak enggau nya, Datuk Amar Awang Tengah meri terima kasih ke pemanah pengawa enggau jasa sekumbang Hairani gawa ba opis menteri nya.

Hairani berengkah gawa ba MUDeNR kena 14 Januari 2019 ba Unit Pemansang Mengeri sebedau belidar gawa ba Unit Administrasyen, Servis Pengatur enggau Pekara Wang nyadi Tuai Unit.

Ngena peneleba ti mayuh ba administrasyen enggau pemansang mengeri, iya udah nya dichiri nyadi Sapit Sekretari Mendam opis menteri nya kena 3 Julai 2023 lalu terus bejalaika pangku pengawa besai nyukung pejalai polisi sereta inisiatif pemansang nengeri.

Hairani deka nampung servis ba Opis Kaunsil Aum Perintah Nengeri (MMKN) nyadi Sekretari Eksekutif berengkah 9 Mac 2026.

Dulu ari nya, pengawa nya mega ngemata serah pangku pengawa entara TPr Wan Sufian ngagai TPr Sri Ratna Dewi Junaidi Sapawi nyadi Tuai Unit Perambu Mengeri enggau Genturung Pendiau ti baru.

Sama datai ngemata pengawa nya Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh enggau bala bukai.-EDISI UKAS