TATAU: Pemansang kandang menua pesisir terus nyadi agenda besai Perintah Sarawak ari nyendiaka infrastruktur bisi kualiti, negap sektor ekonomi sereta ngerembai akses pelajar dikena ngangkat tikas idup rayat manggai 2030.
Menteri ba Opis Premier Sarawak, Dato Sri John Sikie Tayai madah, perintah nengeri bisi juluk penatai pemisi tetiap ruang bilik di Sarawak datai urung RM15,000 sebulan manggai 2030.
Ku iya, juluk nya begunaka pemansang ti nyerangkung semua perengkaguna pemun, pemansang ekonomi sereta peluang pelajar ti sedandang agi kelebih agi ba kandang menua pesisir.
“Perintah Sarawak nengah dua agensi besai iya nya Mid Rajang Regional Development Agency (MiRRDA) enggau Bintulu Rural Development Committee (BiRDCOM) deka terus chakah bejalaika pemansang infrastruktur enggau ekonomi ba sitak tu nyengkaum projek nyeruri jalai ba sitak DUN Kakus,” ku iya.
Iya madah munyi nya ba Pengawa Bejadi Jalai Mua Rumah Danggat Anak Nuing, Sungai Kana, Anap, Tatau di Rh. Danggat, Sungai Kana, Anap, ditu Hari Minggu.
Pengawa nya mega digulu Kaban Parlimen Selangau, Edwin Banta sereta Pegawai Pelilih Tatau, Calvin Ligong Bujang@Endawie.
Berebak enggau nya, Dato Sri John Sikie nerangka pemansang ekonomi menua pesisir deka terus ditegap nengah sekeda inisiatif di baruh MiRRDA nyengkaum bantu nanam sawit, kupi sereta projek nupi jani dikena nambah penatai pemisi peranak.
Nambah ke nya, perintah nengeri mega meri perati ngagai pemansang modal mensia nengah bemacham inisiatif pelajar baka Skim Pelajar Tinggi Pechuma Sarawak (FTES) ti dipejalai ba empat universiti dipenggi perintah nengeri.
Tuju inisiatif nya, terang iya, nentuka anak Sarawak bisi peluang nampung pelajar ngagai tikas tinggi agi lalu nempa pengereja landik ti ulih nyukung pemansang nengeri.
Dulu ari nya ba jaku pengelalu, Calvin ngelalau peranak ngena manah agih belanja Projek Mit Pemansang Menua Pesisir (MRP) ti diberi pengari rayat.
Iya nyemetak madah, agih belanja nya enda patut dibagi ngagai tetiap pintu bilik, tang dikena bejalaika pemansang rumah panjai ti meri pemaik ngagai semua.
Pengawa nya mega diisi enggau licha ari Opis Pelajar Pelilih Tatau Sebauh sereta Balai Bomba enggau Penyah Penusah Tatau.
Program nya digulu pengari mayuh agensi nyengkaum Opis Pelajar Pelilih Tatau Sebauh, Balai Bomba enggau Penyah Penusah, IPD Tatau sereta Sarawak Forestry Corporation (SFC), kelimpah urung 60 Tuai Rumah enggau urung 400 peranak menua nya.-EDISI UKAS
