LIMBANG: Kereja muai tanah tusur ti ngalitka jalai ba Jalai Buangsiol, Kampung Bukit Kota dipejalai enggau lanchar diatu lalu disadang tembu diadu sebedau jalai nya ulih ditengah baru mensia mayuh kena Hari Enam tu.

Sapit Menteri Industri Pemakai, Komoditi enggau Pemansang Kandang Menua Sarawak ti mega Kaban Kunsil Nengeri (ADUN) Bukit Kota, Datuk Dr. Abdul Rahman Ismail madah, raban Opis Kereja Raya (JKR) udah ngepun pengawa muai tanah pengudah penusah nyadi lalu diatu datai ba hari ketiga.

Ku iya, penusah tanah tusur nyadi Hari Enam nyin tadi udah ngelamun jalai dia lalu ngeruga pengelikun peranak semak dia.

“Nentuka pengelikun peranak, tiga ruang bilik ti diau semak endur penusah udah diasuh pindah dulu seraya nganti dia likun endur diau.

“Taja pia, gaya hari majak manah pengudah ujan ngetu kenyau ari Hari Enam tu tadi udah nyaup negapka struktur tanah lalu meri awak raban JKR nerus pengawa muai tanah enggau ngadu ke jalai,” ku iya lebuh dirandau ba pejalai ngabas endur penusah kena Hari Dua.

Iya nerang, entara kereja benung diadu nyengkaum mindah ke tanah tasur enggau ngaga sapat ba tinting dikena negapka struktur tanah enggau ngambi penusah enda betandu.

Iya madah baru, raban JKR disadang ngepun penagwa nganchau batu pagila sebedau melakin baru jalai nya kena Hari Empat.

“Kereja melakin disadang sehari sebedau jalai diteju entap dulu. Enti semua lanchar, jalai ulih ditengah baru mensia mayuh Hari Enam tu,” terang iya.

Berebak enggau nya, iya meri terima kasih ngagai raban JKR ti sikar mutar penusah nya nentuka pejalai peranak lanchar.

Ku iya, penusah nya udah ngujungka peranak nyau betengahka jalai alternatif ti jauh agi nengah Sibukang Bypass tauka Jalai Tujuh Batu Keliling.

“Nya alai, kitai meri terima kasih besai ke pengepuh raban JKR ti sikar gawa nembuka pengawa ngadu jalai enggau lengkas,” ku iya.

Iya mega madah, peranak ba tiga buah rumah diasuh mindah sebedau tu dikemendar pulai baru ke rumah sida pengudah jalai nya ulih ditengah enggau likun.

Sama datai, Sapit Residen Bagi Menua Limbang, Marie Cotilla Louise sereta Injinia Bagi Menua JKR Bagi Menua Limbang, Louis Jonathan Philip.-EDISI UKAS