MUKAH: Penerima Bantu Barang Diguna Pemun Sarawak (SKAS) 2026 di sitak Kunsil Nengeri (DUN) Tellian meri terima kasih ke penyiru Perintah Sarawak ti udah mantu ngelempungka tating belanja idup.

Ba randau begulai enggau UKAS pengudah Pengawa Ngelanchar SKAS 2026 Renggat DUN Tellian kena Hari Dua, bala penerima madah ke bantu nya besai reti kelebih agi dikena belanja ninting hari bebeli ke barang diguna pemun.

Mohamad Jali Kawi, 78, madah ke bantu nya chukup berega lalu ngarap ke nya ulih ditandu dudi hari.

“Serimbai ngelanchar SKAS sehari tu, aku meri terima kasih ngagai YAB Premier laban meri bantu ngagai rayat.

“Aku ngarap ke bantu baka tu deka ditandu dudi hari,” ku iya.

Seraya Winnie Wena Dominic Lai, 57, meri terima kasih laban bantu nya udah mantu ngelempung tating belanja ditapi iya.

“Terima kasih ngagai YAB Premier laban meri peluang ngagai aku nerima SKAS.

“Aku chukup beterima kasih laban bantu ngelempungka tating belanja aku lalu aku ngarap ke mayuh agi bantu baka tu diberi ngagai sida ti begunaka bantu,” ku iya.

Ba Adih Injing, 48, iya madah ke bantu nya endang mantu iya meli barang barang diguna besehari-sehari.

“Aku chukup gaga laban ulih nerima SKAS tu. Tu endang mayuh nyaup lalu aku ngarap pemeri baka tu deka ditandu baru,” ku iya.

Siku da penerima, Raunah Jara’ee, 63, mega meri terima kasih ke bantu ti ngemuntangka iya meli barang diguna pemun.

“Terima kasih ngagai YAB Premier laban meri pemeri SKAS ti ngelantangka kami meli barang diguna pemun,” ku iya.

Bantu SKAS diberi ngena bauchar digital S Pay Global ke alai penerima ulih meli barang diguna pemun enggau lantang sereta fleksibel agi.

Bala penerima ngarap ke inisiatif baka SKAS ulih ditandu dudi hari dikena mantu mayuh agi rayat Sarawak ti begunaka bantu.-EDISI UKAS