PAKAN: Inisiatif Perintah Sarawak nandu program bantu nengah Bantu Barang Diguna Pemun Sarawak (SKAS) mantu rayat kelebih agi ba kandang menua pesisir napi ekonomi kemaya hari ti enda tegap.
Kaban Kunsil Nengeri (ADUN) Pakan, Tan Sri William Mawan Ikom madah, inisiatif SKAS nyadi entara chara perintah nengeri nentuka pengelantang rayat terus dijaga meruan.
Ku iya, bantu nya meri mayuh pemaik kelebih agi ngagai raban seranta laban nya mantu sida meli barang diguna ninting hari.
“Bantu baka tu ngayanka penyiru perintah nengeri ti seruran betati ke pengelantang rayat.
“Kitai patut meri terima kasih enggau ngenang semua pemanah pengawa bala tuai ti naka ulih nentuka rayat ulih diau lantang agi,” ku iya lebuh bejadi Pengawa Ngelanchar SKAS Renggat Sitak Kunsil Nengeri (DUN) Pakan di Balai Komuniti Pakan, kena Hari Dua.
Iya madah baru, taja Sarawak ngembuan peranak ti mimit agi dibanding nengeri bukai, tang nengeri tu kaya enggau pemansut ti tau dikena bejalaika pemansang enggau ngintu pengelantang rayat.
Nengah program baka SKAS, rayat ku iua bisi peluang nentuka barang diguna pemun ba ruang bilik ulih dibeli sereta nyamin bekal pemakai seruran bisi ba tetiap ruang bilik
Berebak enggau nya, Tan Sri William Mawan mega ngingatka bala penerima ngena manah bantu diberi sereta enda salah guna ungkup pekara ti nadai mai penguntung.
Iya nyemetak madah, bantu nya patut dikena meli barang diguna diri sebilik, ukai disilih tauka dijual ungkup pekara bukai ti nadai meri penguntung.-EDISI UKAS
