Sistem Bantu Rama Perintah Sarawak Ngintu Pengelantang Rayat
SERIAN: Perintah Sarawak terus ransing nyendiaka sistem bantu rama ti nyerangkung semua ngagai rayat nengah bemacham skim ngintu pengelantang enggau inisiatif ti dipejalai ari ada nyentuk midang.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, perintah nengeri seruran naka ulih nentuka rayat ti begunaka bantu enda dikelaung ari bemacham program bantu ti diberi nengah Opis Pengintu Pengelantang Mensia Mayuh Sarawak (JKMS).
Ku iya, bemacham skim bantu pengelantang disedia nyadi rentayan nyamin pengelantang rama dikena mantu rayat napi penusah idup enggau nentuka pengelantang komuniti terus dijaga.
Iya nyebut jaku nya lebuh bejadi Majlis Sejambak Kasih Aidilfitri 2026 di Dewan Panggah, Palan Opis Perintah Sarawak Bagi Menua Serian kena Hari Dua.
Iya madah baru, bala tuai Perintah Sarawak ti ransing gawa mega ngesan pangku pengawa besai nentuka nengeri tu terus likun, mansang enggau lantang.
“Pemadu beguna iya nya kitai terus idup beserakup, bebasa ke pangan diri ngambi Sarawak terus nyadi nengeri pemaduh lantang endur diau di Malaysia,” terang iya.
Pengawa diatur JKMS nya meda 100 penerima bantu pengelantang dirami, seraya 230 penerima da deka nerima bantu dipasuk terus ke akaun bank sida empu.
Ke penemu, Perintah Sarawak nengah JKMS ngagihka RM216,767.60 dikena ngemujur Program Sejambak Kasih Aidilfitri di selampur nengeri.
Seraya Sapit Menteri Dagang Temuai, Industri Kreatif Enggau Seni Pemerindang Sarawak Datuk Snowdan Lawan madah, program nya nyadi pelasar beguna JKMS nentuka pengelantang rayat seruran dijaga kelebih agi raban orang tuai, seranta enggau orang ti begunaka bantu rama.
Sama datai, Pemangku Residen Bagi Menua Serian Abdul Khalid Manap, Sapit Direktor JKMS, Norhayati Abdul Rahman, pengari Pegawai Pelilih Serian Jeff Currant James Engkapan sereta Pegawai Pengintu Pengelantang Mensia Mayuh Bagi Menua Serian, Robert Jullong Begat.-EDISI UKAS
