KUCHING: Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg nerima penemuai basa Duta Besai Perancis ke Malaysia Marc Abensour di Kompleks Satria Pertiwi, Petra Jaya, kena Hari Tiga.

Tuju penemuai basa nya nyerungkai peluang meranak puku begulai entara Sarawak enggau Perancis dikena negut kerejasama strategik ba sekeda sektor besai ti meri penguntung begulai.

Randau nyelinting pengawa negap kerejasama ba sekeda sektor strategik nyengkaum Pelajar enggau Latih Teknikal enggau Vokasional (TVET), industri maritim enggau penerebai, kuasa ulih dikena baru, minyak enggau gas mungkur aktiviti huluan sereta hiliran, kelimpah teknologi nangkap, ngena enggau nyimpan karbon (CCUS).

Semua sektor nya setipak enggau Strategi Pemansang Pengudah COVID-19 (PCDS) 2030 ti meri perati ngagai ekonomi meruan tumbuh, pemansang kuasa ulih dikena baru sereta ekonomi digital ngerembai.

Lebuh berandau, Marc Abensour mega ngaku penuduk Sarawak majak entap nyadi palan dipilih endur meranak puku bepuguka teknologi tinggi enggau meruan, disukung pemansut kuasa ulih dikena baru ti mayuh sereta infrastruktur industri ti tegap.

Ba rampa politik ti tegap, Sarawak ku iya, meri pengandal sereta jamin ngagai pengawa meranak puku ungkup timpuh panjai ditambah penuduk strategik di Borneo nyadi pintu penama ke makit komuniti ASEAN ti sedandang agi.

Sama datai, Direktor Opis Kandang Menua Sarawak Opis Menteri Luar Nengeri Dato Fenny Nuli, Sapit Kaunselor Ekonomi Bouthaina Harfi enggau Kaunselor Kerejasama enggau Pekara Main Asal di Kedutaan Perancis di Malaysia Thierry d’Anna. -EDISI UKAS