KUCHING: Kepala Polis Sarawak, Datuk Mohamad Zainal Abdullah ngatur penemuai basa ngagai Sapit Premier Sarawak, Datuk Amar Awang Tengah Ali Hasan di Wisma Sumber Alam ditu, kena Hari Tiga.

Penemuai basa nya sebagi ari pejalai gawa Datuk Mohamad Zainal ngagai bala tuai kanan nengeri tu kenyau ari mangku pengawa nya kena pada 26 September 2025 nyilih Dato Mancha Ata ti pinchin.

Lebuh dirandau, iya madah ke nya pengawa ti semampai dipejalai sebarang pegawai ti baru dipadu gawa ngambi berandau sereta madah kediri ngagai bala tuai kanan nengeri.

"Randau sehari tu meri peluang ngagai aku berandau enggau Sapit Premier Sarawak ti mega pengari rayat (Kaban Kunsil Nengeri) ba menua aku empu, iya nya Bukit Sari.

"Alhamdulillah, sebedau tu aku udah ngatur penemuai basa ngagai Yang di-Pertua Negeri Sarawak, Premier Sarawak sereta dua Sapit Premier Sarawak ke bukai," ku iya lebuh dirandau Unit Komunikasi Awam Sarawak (UKAS) pengudah tembu penemuai basa nya.

Nerang silik, Datuk Mohamad Zainal madah, iya mega bekunsi penerang bekaul pekara pengelikun enggau pengelantang rayat sereta ngenang pasal perengkaguna enggau fasiliti Polis Diraja Malaysia (PDRM) kelebih agi di Lawas ti diperati tau ditambah agi dikena negap penau bala terabai menua di sitak nya.

“Aku mega bekunsi penemu bekaul pkara pengelikun di Sarawak nyengkaum isu lokal di Pelilih Lawas baka penanggul dadah, penyalah enggau sekeda pekara bukai ti begunaka perati begulai.

“Entara pekara bukai bisi dikenang iya nya bekaul fasiliti PDRM di Lawas ti tau dikemanah, lalu Datuk Amar Awang Tengah tau nyaup laban sitak nya dipegai iya,” ku iya.

Berebak enggau nya, iya mega meri terima kasih ngagai Datuk Amar Awang Tengah ti udah ngelimpangka awak diri berandau sereta ngelalu penatai iya.-EDISI UKAS