KUCHING: Penyikar raban ngatur Palan Pengenduh (PPS) di Batu Kawa nentuka raban tasah bah nerima bantu enggau utai diguna pemun ti chukup sekumbang diau ngenduh dia dipuji.
Sapit Premier Sarawak ti mega Chairman Penyangga Penusah Nengeri Sarawak (JPBNS), Datuk Amar Douglas Uggah Embas madah, iya tepantup ati meda pengawa raban pengatur ba dua PPS nya iya nya di Balai R-Piang, Kampung Sinar Budi enggau Balai Stapok ti endur 90 ruang bilik ngaul 340 orang tasah bah ari genturung pendiau ti sama diau ngenduh.
“Aku tepantup ati meda pemanah pengawa diadu ba endur tu sehari tu. Aku meda semua diatur enggau lanchar sereta bekal ti diguna mega chukup,” ku iya lebuh dirandau media pengudah ngabas PPS nya Hari Tiga.
Iya madah, gaya kededua palan pengenduh nya diatur manah sereta semua utai diguna sida ti tasah chukup magang disedia.
Iya nerang, kerejasama rat agensi penyah penusah enggau komuniti dia mega beguna endar nentuka pengawa mindah orang tasah lanchar.
Iya mega madah, taja bisi raban orang timpang pendiau (OKU) enggau orang tuai ba sida ti tasah, pekara nya enda nekul pengawa mindah laban sida meri kerejasama ngagai raban bekuasa.
“Tu nunjukka semangat kerejasama ti dipinta kitai maya bisi penusah nuntung baka bah. Raban tasah meri kerejasama rat lebuh digerah mindah,” ku iya.
Iya madah baru, operasyen mindah ti berengkah pukul 1 dini hari nya mujur diatur enggau berurun asil ngasi ke atur operasyen standard (SOP) penyangga penusah ti majak tegap.
Iya nerang, operasyen nya digerah ari renggat Residen enggau Pegawai Pelilih ari kerejasama mayuh agensi nyengkaum Raban Penyangga Orang Periman Malaysia (APM), Polis Diraja Malaysia (PDRM), Opis Bomba enggau Penyah Penusah Malaysia (JBPM) sereta agensi bekaul bukai.
“Semua agensi bejalaika pangku pengawa diri empu nentuka orang tasah likun. Naka diatu, kitai chukup beterima kasih laban nadai pekara dikeenggai nyadi,” ku iya.-EDISI UKAS
