MIRI: Program “Kick Off Transport–Awareness Behavioural Change (T-ABC) enggau MyLesen B2 Tahun 2026” Renggat Miri dilanchar nyadi insiatif nambah penemu pengelikun jalai alun sereta mantu rebak biak belajar ngambi lisin motosikal.

Menteri Pengangkut Sarawak ti mega Kaban Kunsil Nengeri (ADUN) Senadin, Dato Sri Lee Kim Shin, madah ke program nya dipejalai nengah kerejasama Opis Menteri Pengangkut Sarawak (MOTS) begulai enggau sekeda agensi bekaul nentuka mayuh agi orang bekenaka motosikal kelebih agi nembiak bisi lisin deriba.

Ku iya, inisiatif MyLesen B2 ti dipejalai kenyau ari dua taun ke udah nerima timbal manah enggau mujur mantu mutar isu nembiak tin gena motosikal ke sekula nadai lisin.

“Nengah program tu, bayar kebendar ngambi lisin motosikal urung RM750, tang di baruh program MyLesen B2 sida semina mayar RM250 aja laban bayar bukai udah disubsidi,” ku iya ngagai media pengudah berandau begulai enggau agensi bekaul di Opis Pengangkut Darat (JPJ) Miri kena Hari Dua.

Iya madah, ungkup taun tu, program nya deka dikerembai ngagai semua sekula sekondari di Pelilih Miri enggau nyelinting 1,000 nembiak.

Peminta deka dibuka berengkah 11 Mac 2026 enggau pom peminta nadai bebayar deka diberi nengah Opis Pelajar Pelilih Miri ngagai semua sekula sekondari.
‘
Nembiak beumur 16 taun enggau tuai agi ti ngena motosikal ke sekula diperansang ngisi peminta sebedau pom nya ditikal ngagai raban sekula ngambi diberi ngagai JPJ Miri ti nyadi sekretariat program.

Bala penyereta ti mujur deka ngulu latih deriba sereta peresa ngambi lisin ti ditetap.

Program nya dipejalai nengah pengawa begulai strategik entara MOTS enggau sukung Palan Servis ADUN Senadin, JPJ Nengeri Sarawak, JPJ Pampang Miri, Polis Diraja Malaysia (PDRM), Opis Pelilih Miri, Opis Pelajar Pelilih Miri sereta Institut Memandu City Miri.

Kelimpah latih enggau peresa lisin, bala penyereta mega ngulu penerang khas pasal pengelikun jalai alun ngaul licha ari raban PDRM bekaul atur trafik enggau operasyen pengelikun jalai alun.

Sama datai Malaysian Institute of Road Safety Research (MIROS) ti deka bekunsi penerang pun penusah bebadi nyadi sereta gaya penusah bebadi jalai alun ba raban nembiak.

Dato Sri Lee madah ke program nya deka diatur pengelama tiga bulan enggau peresa praktikal disadang diatur bulan Jun sebedau pengawa nutup program.

Iya mega madah, kelimpah 1,000 lisin ungkup nembiak sekula, raban sida mega merambu nyendiaka 1,000 da lisin MyLesen ngagai mensia mayuh enti sema bisi peluang pengudah nembiak rejista.

Nambah ke nya, ku iya, opis menteri mega merambu numbuh inisiatif Bakih Pengelikun Jalai Alun ti ngaul raban nembiak nyadi duta pengelikun jalai ti deka marit bakih serebak nyadi penguna ti bisi tanggungpengawa.

Pengawa nya sebagi ari inisiatif Perintah Sarawak ti ransing nambah penemu pasal pengelikun enggau ngurang penyampau kes bebadi kelebih agi raban nembiak.-EDISI UKAS