KUCHING: Raban terabai Opis Menteri Pemansang Indu, Nembiak Mit enggau Pengelantang Komuniti Sarawak (KPWK) dipinta nambah tikas pemereti ati ba semua inisiatif opis menteri nentuka tetiap bantu enggau servis ulih diberi efektif agi ngagai rayat.

Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah madah, staf ba tetiap opis patut nemu agi pasal bantu ti disedia nyengkaum ba pekara ukai pengawa sida, seagi nya di baruh inisiatif opis menteri.

“Raban terabai patut bisi penemu ti mayuh pasal servis disedia laban mensia mayuh ti datai deka nanya mayuh pekara, ukai semina bekaul pekara di baruh sekeda seksyen aja.

“Nya alai, sida patut sedia nyaup tanya ti diberi, abis nadai, sida patut nemu raban tauka unit ni patut endur betanya enti sema pekara nya ukai pengawa sida,” ku iya.

Iya nyebut pekara nya lebuh bejaku ba sesyen Townhall KPWK di PUSTAKA Sarawak, ditu Hari Tiga.

Iya nerang, staf enda patut semina madah kediri enda nemu laban nya diadu seksyen bukai laban chara baka nya enda ngayanka servis ti sikar enggau meruan ba penemu mensia mayuh.

Dato Sri Fatimah nyemetak madah, bantu terabai menua naka diatu beguna endar kelebih agi lebuh opis menteri belidar ngagai digital, ti mayuh meri pemar ngagai klien kelebih agi sida ti diau ba menua ulu enggau orang tuai ti minta akses penuh ba inisiatif KPWK.

“Agi bisi raban, tauka engka seraban ti signifikan, napi penanggul ari sukut peminta, baka nengah tali arus, ba mayuh servis ti disediaka kitai lalu kitai endang patut nemu enggau mantu sida,” ku iya.

Berebak enggau nya, iya bisi nyua bantu ngagai lapan penerima nyengkaum Bantu Indai Beranak, Bantu Berubat, Tuai Ruang Bilik Indu Sarawak enggau Geran Model Negap Indu Sarawak.

Sama datai, Sapit Menteri Pemansang Indu, Nembiak Mit enggau Pengelantang Komuniti Sarawak Datuk Rosey Yunus, Direktor Opis Indu enggau Ruang Bilik Sarawak Salmah Jobeli, Sapit Sekretari Mendam KPWK Kathreen Lalai Eddie Saga enggau Sapit Direktor Opis Pengintu Pengelantang Mensia Mayuh (JKM) Sarawak Norhayati Abdul Rahman. -EDISI UKAS