“Nyadi pengari rayat sitak DUN N.46 Meradong, aku chukup lantang ati laban program tu ulih dipejalai ditu lalu ngarap ke bantu diberi ulih nyaup bala penerima meli barang diguna pemun sereta ngasuh pengidup kita sebilik berasai lantang,” ku iya.
Iya nibar ke jaku nya ba Pengawa Ngelanchar Bantu Barang Diguna Pemun Sarawak (SKAS) 2026 Renggat DUN N.46 Meradong diatur di G-Mart Bintangor, kena Hari Tiga.
Ba taun 2026, program SKAS agi ngetan kategori penerima baka taun sebedau tu iya nya ruang bilik penatai pemisi RM5,000 enggau mimit agi nerima bantu RM950 setaun, orang tuai nadai tawing nerima RM500 setaun, seraya orang bujang bepenatai pemisi RM2,500 enggau mimit agi nerima RM300 setaun.
Bantu ari baruh inisiatif SKAS nya diberi berenggat nentuka pemaik ulih diasai raban ti patut di selampur Sarawak.
Bantu diberi tiga renggat iya nya bulan Mac, Mei enggau November taun tu.
Ba kategori ruang bilik, renggat keterubah enggau kedua ngagai tetiap penerima deka nerima RM316 seraya renggat ketiga penyampau RM318, ke alai semua nya manggai RM950 setaun.
Pia mega ba kategori orang tuai, penerima deka nerima RM166 ba renggat keterubah enggau kedua sereta RM168 ba renggat ketiga, semua penyampau RM500 setaun.
Seraya kategori bujang, bantu RM100 deka diberi tiga kali, iya nya ngaul RM300 semua bantu ungkup siku penerima.
Berebak enggau nya, nama orang ti patut nerima SKAS tau diperesa belabuh 7 Mac 2026 lalu Datuk Ding ngarap ke sida nya ulih meresa nama enggau ngambi bantu nentuka sida bulih pemaik ari bantu disediaka Perintah Sarawak nya.
Iya mega ngarap ke program baka nya deka ditandu dudi hari nentuka pengelantang rayat seruran dijaga enggau ditegap. -EDISI UKAS
