SRI AMAN: Chara kaul lantang ari nyadung bubur pedas enggau aktiviti bejalai seraya bekunsi penerang nagang dadah mujur nambah penemu mensia mayuh ba Program Nyadung Bubur Pedas enggau ‘Walking Message Anti Dadah enggau Substance’ Pelilih Sri Aman 2026 diatur ba pelaman Opis Pelilih Sri Aman, kena Hari Tiga.

Program nya asil kerejasama Komiti OSC MIDS Pelilih Sri Aman enggau Gerempung Nagang Dadah Malaysia (PEMADAM) Pelilih Sri Aman.

Tuju inisiatif nya nambah penemu mensia mayuh pasal penyai salah guna dadah enggau substain ditagang ngena chara ngaul komuniti menua nya.

Nyadi sebagi ari inisiatif nya, bisi 100 kantung PEMADAM ti ngundan penerang nagang dadah udah disadung ngagai mensia mayuh.

Kelimpah ari nya, 500 pek bubur pedas mega disadung ngagai agensi perintah, opis, gerempung ukai dikuasa perintah (NGO), tuai komuniti enggau tuai raban bansa.

Sama datai, Pegawai Pelilih Sri Aman Shariff Bujang, Tuai Polis Pelilih Sri Aman Effei Faes, pengari Tuai Pelilih Agensi Benchi Dadah Nasional (AADK) Pelilih Sri Aman Hadi Aiee enggau pengari Pegawai Pelajar Pelilih Sri Aman Angela Sulli Edwin. -EDISI UKAS