SARIKEI: Perintah majak chakah ngatur pengawa ngintu sistem entali ai nengah projek ngintu sungai enggau anak sungai di Pelilih Meradong nentuka ai ulih anyut enggau ngurang genturung pendiau ampuh.
Sapit Menteri Pengawa Bekebun enggau Komoditi ti mega Kaban Parlimen Sarikei, Dato’ Sri Huang Tiong Sii madah, projek nya ngayanka perintah ransing ngemanah infrastruktur entali ai dikena nyamin pengelikun enggau pengelantang peranak menua.
Ku iya, pengawa ngintu sungai ngaul pengawa ngelasi dikena muai ambuh, apat kayu enggau uras bukai ti tau nekul ai ba sungai anyut.
“Ari kereja ngintu sungai tu, aku ngarap ke tu ulih mantu ngurang penusah ampuh kelimpah nentuka ai sungai ulih anyut manah sereta seruran beresi ngambi bisi dikena peranak dia,” ku iya pengudah pengawa nyua taba projek diari ke Wong Soon Mee begulai enggau pegawai ari Opis Parit enggau Entali Ai (DID), ditu, Hari Empat.
Dato’ Sri Huang mega madah ke pengawa ngabas dipejalai nentuka projek nya ulih digaga nitih perambu enggau spesifikasi ti udah ditetap.
Iya madah baru, projek ngintu sungai baka nya beguna amat nentuka sungai seruran beresi enggau ulih dikena, lalu meri pemaik timpuh panjai ngagai peranak menua kelebih agi maya musin pengujan.
Entara genturung ti kena renchah projek baka Sungai Binatang (Palaie) enggau Sungai Tulai di sitak Koperasi Tulai, Meradong.-EDISI UKAS
