BETONG: Pangku pengawa indu Iban ba bala tuai komuniti terus ditegap nentuka pemansang komuniti meruan agi enggau inklusif, kelebih agi ari kaul regas sida ngaga pemutus ba renggat baruh.
Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu madah, pemansang komuniti ti meruan ukai semina bepanggai ba polisi renggay perintah aja, tang bepun ari rumah panjai, genturung pendiau sereta komuniti menua empu.
“Program sehari tu ukai semina latih aja, tang pengawa meranak puku ungkup pemujur komuniti kitai dudi hari. Indu Iban kenyau ari kelia endang besai pangku pengawa nyadi pengibun adat enggau budaya, ngatur ruang bilik enggau tiang sukung ba ekonomi komuniti.
“Ba jeman Sarawak moden, indu ukai semina ngintu ruang bilik aja tang nyadi pengajar, orang dagang, profesional sereta pengatur komuniti ti majak regas ngatur pengawa enggau ngaga pemutus,” ku iya.
Iya nibar ke jaku nya ba mua mayuh lebuh bejadika Program Empowering Iban Women through Community-Based Leadership Programme di Balai Lumba Tan Sri Datuk Amar Stephen Kalong Ningkan, Betong kena Hari Empat.
Berindik ari nya, iya ti mega Kaban Kunsil Nengeri (ADUN) Layar mega meransang indu berani agi bejaku enggau mansutka penemu ba aum komuniti, regas berandauka pemansang sereta bejalaika inisiatif ngatur mayuh program ngaul komuniti ungkup pemaik raban nya.
Ku iya, pengandal rayat nyadi lalau nyadi tuai, nya kebuah tetiap tuai komuniti patut nentuka tetiap bantu enggau belanja pemansang diberi enggau lurus sereta meri pemaik ngagai rayat.
Datuk Gerald mega meri terima kasih ngagai The Iban Women Charitable Trust ti chukup regas ngemansangka kapasiti nyadi tuai indu Iban nengah program nya lalu ngarap ke inisiatif baka nya ulih dikerembai ngagai mayuh agi sitak dudi hari.
