Sekula Sekondari Baru Dilanggur Ba Pantu, Nyukung Guna Pelajar Nembiak
PANTU: Siti sekula sekondari baru dilanggur didiri ba Pelilih Pantu ngambi tetangkupka guna pelajar nembiak dia dudi hari.
Kaban Parlimen Sri Aman, Dato Sri Doris Sophia Brodie madah, langgur nirika sekula nya udah dibantai iya ba Aum Parlimen lalu diatu dalam langgur raban bekaul.
Ku iya, pekara nya mega dikerandau begulai enggau Opis Pelilih Pantu sereta tuai komuniti lokal ba sebengkah aum ti diatur ba Bilik Aum Opis Pelilih Pantu empai lama.
“Taja pengawa nirika sekula nya engka enda ulih dipejalai enda lama da, tang perambu nya udah digaga lalu pengawa ngemujurka nya deka diterus,” ku iya.
Iya madah munyi nya maya bejadi Aum Besai Ninting Taun Gerempung Apai Indai enggau Pengajar (PIBG) Sekula Primari (SK) Pantu Taun 2026, ditu kena Hari Lima.
Nambah ke nya, iya mega nyemetak madah ke kerejasama rat entara raban sekula, apai indai enggau komuniti nya kebuah besai nentuka pemujur sistem pelajar kelebih agi ba renggat baruh.
Ku iya, sukung meruan ari apai indai nengah PIBG ulih nyaup raban sekula bejalaika mayuh inisiatif nambah penyulut akademik nembiak kelimpah nempa pemanah ulah enggau besemekih.
“Nengah kerejasama rat, kitai ulih nentuka genap nembiak bulih sukung pemadu manah nyapai penyulut ba pelajar,” ku iya.
Ba pengawa nya, iya mega ngemendar agih belanja Projek Mit Pemansang Menua Pesisir (MRP) sepenyampau RM10,000 ngagai Turu PIBG SK Pantu dikena nyukung pejalai mayuh program pelajar sereta pemansang nembiak ba sekula nya. - EDISI UKAS
