TATAU: Perintah Sarawak bebendar negap pemansang menua pesisir nengah mayuh inisiatif ekonomi enggau projek perengkaguna rayat.
Menteri ba Opis Premier Sarawak Dato Sri John Sikie Tayai madah, asil penatai pemisi nengeri Sarawak udah nambah ngenyit ari urung RM6 bilion ngagai urung RM13 bilion setaun taun nyin tadi kenyau ari dikemudi Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
“Asil nengeri ti nambah tu nentuka perintah bejalaika mayuh projek pemansang enggau inisiatif dikena nyaga pengelantang rayat kelebih agi ba kandang menua pesisir,” ku iya.
Iya madah munyi nya ba Pengerami Tuai Ngundang Rayat ti diatur ba Rumah Serai Anak Blachan, Sungai Sepalau, Muput, Tatau kena Hari Lima.
Nambah ke nya, Dato Sri John mega nyemetak madah ke sektor betanam betupi kelebih agi betanam sawit bisi pengulih besai nyungkak ekonomi peranak menua pesisir lalu mayuh peranak udah mujur nambah penatai pemisi nengah aktiviti nya.
Kaban Kunsil Nengeri (ADUN) Kakus nya mega madah, bantu betanam sawit deka dipejalai nengah Mid Rajang Regional Development Agency (MiRRDA) dikena nyaup pekebun ba sitak Parlimen Selangau enggau Kanowit ti ba baruh agensi nya.
“Pia mega, bantu nengah skim nanam kupi sereta projek nupi jani enggau manuk mega deka dipejalai dikena nambah peluang ekonomi ngagai peranak lokal,” ku iya.
Ba pengawa nya, Dato Sri John Sikie Tayai mega ngemendar geran sepenyampau RM37,000 ngagai Komiti Pemansang enggau Pengelikun Genturung Pendiau (JKKK) Rumah Serai sereta RM8,000 ngagai Gerempung Indu Rumah Serai dikena nyukung ngatur aktiviti enggau pemansang komuniti rumah panjai nya. - EDISI UKAS
