KUCHING: Penyarut ti majak nyadi ba rantau Teluk ulih meri empas ngagai ungkus penerebai nyengkaum pejalai entara Sabah, Sarawak enggau Semenanjung Malaysia berindik ari rega minyak dunya niki.

Sapit Menteri Besai, Datuk Amar Fadillah Yusof madah, rega minyak global ti niki nya disadang meri empas ngagai ungkus insurans sereta logistik seraya ngeruga ungkus pengangkut langit enggau tasik.

Ku iya, pekara nya engka meransang pengawa netapka surchaj bahan api dalam penerebai domestik enggau antarabansa ti ngujungka meri empas ngagai ungkus pejalai rayat, nyengkaum ba Sarawak.

“Lebuh rega minyak niki, ungkus insurans enggau logistik mega deka niki. Tu nyengkaum ungkus operasyen bilun enggau pengangkut tasik.

“Pejalai entara Sabah, Sarawak enggau Semenanjung mega ulih tekeruga laban engka netapka surchaj bahan api dalam penerebai domestik enggau antarabansa,” ku iya.

Iya madah munyi nya lebuh dirandau pemberita pengudah ngulu Program Sumbangsih Santunan Kasih Seindah Syawal di Palan Servis Kaban Kunsil Nengeri (ADUN) Samariang ditu kena Hari Enam.

Nambah ke nya, Datuk Amar Fadillah mega minta mensia mayuh bekelimat ngena kuasa dikena ngurangka pengawa ngena bahan api sereta nentuka bekal kuasa menua ulih dikena ba timpuh ti lama agi.

Ku iya, Malaysia diatu agi bisi bekal khas ti chukup abis nadai nyentuk Mei, kelimpah sekeda alternatif bekal ti udah dikelala Petroliam Nasional Berhad (PETRONAS), nyengkaum pemansut ari Australia.

Iya mega madah, penuduk ekonomi enggau pekara wang menua diatu agi ba tikas manah enggau beretan tang pengawa bejaga meseti terus dipejalai nyema penyarut tu majak nyadi. - EDISI UKAS