MIRI: Pengawa numbuh St. Columba’s Care Ministry Centre nyadi siti inisiatif besai reti nyendia palan sukung, nyaga enggau interaksyen rama ngagai orang tuai ba mengeri tu.

Sapit Menteri Dagang Temuai, Industri Kreatif enggau Seni Pemerindang Sarawak ti mega ADUN Piasau, Datuk Sebastian Ting Chiew Yew madah, palan nya ditumbuh dikena meri awak ngagai orang tuai kelebih agi sida ti diau kediri tauka anak ti gawa maya siang hari dikena ngisi awak enggau aktiviti ba endur ti lantang enggau likun.

Ku iya, palan nya nyendia endur ungkup orang tuai begempuru, berandau sereta ngerapit kaul bebakih nengah mayuh aktiviti ti diatur raban gerija begulai enggau volunteer.

“Nengah fasiliti enggau program baka tu, orang tuai ulih terus aktiviti sereta ngambi bagi chara rama pengudah pinchin sereta nyeliah sida ngasai ke diri dikelaung tauka kena tinggal ba rumah,” ku iya.

Iya madah munyi nya maya bejadi Opening Ceremony of St. Columba’s Care Ministry Centre ti diatur di St Columba Kindergarten, ditu kena Hari Enam.

Ku iya agi, inisiatif bepelasarka komuniti baka tu beguna amat berindik ari penyampau tubuh orang tuai ba Sarawak majak nambah.

Ku iya, palan baka nya ukai semina nyendia endur ti likun ngagai orang tuai tang mega negap pengawa begulai enggau ngembuan tuju idup ngagai raban nya.

Kelimpah ari nya, iya madah ke palan nya meri pengelantang ngagai diri sebilik ti gawa laban apai indai sida bisi palan ti likun enggau diberi perati sepanjai hari. - EDISI UKAS