KUCHING: Sapit Menteri Besai ti mega Kaban Parlimen Petra Jaya, Datuk Amar Fadillah Yusof ngelimpang awak diri ngabas Program Kelam Carbut ti diatur di Taba Lama Kubah Ria kena malam Hari Enam.

Iya ti disempulang Tuai Sekretari Politik Premier Sarawak, Dato Fazzrudin Abdul Rahman ngabas program belepa diatur Parti Pesaka Bumiputera Bersatu (PBB) ti ngempuru pengawa nyual pemakai, barang Hari Raya Aidilfitri sereta palan moreh serimbai bulan Ramadan.

Iya mega bisi ngabas tetiap taba bejual, meli pemakai sereta berandau enggau bala pedagang ti tebal agi ari raban nembiak ari sitak Tupong.

Pia mega, iya bisi berandau enggau bala pengusung ti datai sekali ke belepa tauka meli barang ti dijual ba taba nya.

Nangkan nya, Dato Fazzrudin lebuh dirandau pemberita madah ke program ti kedua kali diatur nya nerima timbal ti chukup manah ari mensia mayuh.

Ku iya, atur program baka nya ulih ngerichah pengawa entara komuniti seraya meri awak ngagai orang dagang mit nambah penatai pemisi.

“Alhamdulillah, timbal chukup manah lebuh dipasuk 25 penyereta ti bejual lalu kitai deka nguji ngatur program nya ninting bulan,” ku iya.

Iya mega madah, raban pengatur mega deka nentuka program nya ulih ngati kediri nengah suwa taba lalu meransang bala penyereta kreatif agi nambah penatai pemisi.

Nambah ke nya, Sapit Tuai Nembiak PBB Tupong ti mega Tuai Projek Kelam Carbut, Zulaikha Ibrahim madah, program nya dilanggur diatur ninting taun lalu engka penyereta ti bejual nambah dudi hari.

Tukang Wang PBB Tupong ti mega Sapit Tuai Projek Kelam Carbut, Sharifah Nur Shaqeera Wan Jodan madah, program nya deka diatur ari Hari Lima nyentuk Hari Minggu ninting bulan ba taba ti sama.

Ku iya, timbal ari bala penyereta ti bejual mega chukup manah laban palan nya sedandang sereta richah agi lebuh program nya diatur. -EDISI UKAS

Pemberita : Ahmad Daniel Faiz
Gambar: Ahmad Daniel Faiz & Muhd Naseem