KOTA SAMARAHAN: Perintah MADANI ransing negap sektor pekebun mit lebuh niki ke penyampau bantu Program Nanam Baru Getah Kaunsil Pemansang Pekebun Mit Getah (RISDA) ba Sarawak ari RM14,805 ngagai RM23,000 sehektar, nambah 55 peratus.

Sapit Menteri Besai ti mega Menteri Pemansang Genturung Pendiau enggau Kandang Menua, Datuk Patinggi Dr Ahmad Zahid Hamidi madah, penyampau ti nambah RM8,195 sehektar nya mandangka penyiru perintah ngagai pemar ti ditapi pekebun mit nyengkaum nambah ungkus pemansang kebun, logistik sereta kereban betanam betupi.

“Perintah semampai mendingka sada rayat enggau mereti ke pemar ti nyadi.

“Nya kebuah, kitai bejalaika inisiatif ti engkeman agi enggau nikika penyampau bantu nanam baru getah ba Sarawak ngagai RM23,000 sehektar,” ku iya.

Iya madah munyi nya lebuh Program Santunan Kasih Ramadan enggau Program Pengelantang Pekebun Mit RISDA Sarawak 2026 di Masjid Darul Istiqamah, Kampung Niup, kena Hari Lima.

Nangkan nya, iya nerang ke bantu nya deka diagih nengah lima renggat bebayar ti nyerangkung nyendia kebun, bekal benih, sum sereta kereban betanam betupi nentuka pemansang kebun getah ulih dipejalai nemban agi.

Berebak enggau nya, iya madah ke penyampau bantu Program Nanam Baru Getah ungkup Semenanjung Malaysia enggau Sabah deka dibantai perintah enda lama da.

Ku iya agi, pengawa negap sektor getah deka terus dikemansang nengah mayuh inisiatif nyengkaum nambahka pengawa ngena getah ba sektor industri baka kereban melakin jalai sereta produk bepelasarka getah ti bisi pengulih nambah peminta makit.

“Lebuh pengawa ngena getah dikerembai, tu deka nyaup nambahka rega komoditi nya lalu meri asil ti manah agi ngagai sida ti nangkal getah enggau pekebun mit ba selampur menua,” terang iya.

Nambah ke nya, Program Santunan Kasih Ramadan ti diatur RISDA nyadi pelasar nyaga pengelantang komuniti nengah pengawa nyendia mayuh bantu ngagai komuniti.

Entara isi program iya nya nyua agih belanja pemansang RISDA Nengeri Sarawak 2026 sepenyampau RM29,257,190, kelimpah bantu pemakai ngagai 120 peranak Kampung Niup.

Bisi mega disua agih belanja ngagai institusyen sepenyampau RM3,000 ngagai Masjid Darul Istiqamah enggau Surau Kampung Niup kelimpah bantu ngagai 30 nembiak Pusat Pengajian Tafaqquh Tahfiz Al-Makk sereta 20 anak patu balu ari genturung pendiau nya.

Sama datai, Sapit Menteri Pemansang Genturung Pendiau enggau Kandang Menua ti mega Kaban Parlimen Kota Samarahan Datuk Rubiah Wang, Sapit Speaker Kunsil Nengeri Sarawak ti mega ADUN Muara TuangDato’ Haji Idris Buang, Sapit Menteri Industri Kreatif enggau Seni Pemerindang Sarawak, Datuk Snowdan Lawan, Chairman RISDA Malaysia, Manndzri Nasib, ADUN Rungkup, Perak, Dato’ Shahrul Zaman Yahya, Orang Besar Jajahan Pelilih Bagan Datuk, Perak, Toh Seri Lela Paduka Dato’ Dr. Khalid Ismail enggau Residen Bagi Menua Samarahan, Mohamad Irwan Bahari Bujang. - EDISI UKAS