KANOWIT: Pegawai Pelilih ulih minta kuota tambah ungkup nyiri Komiti Pemansang enggau Pengelikun Genturung Pendiau (JKKK) ari raban pemesai nyengkaum Sekretari Perintah Sarawak dikena nyaup mutar isu komuniti kelebih agi bekaul pengawa nyiri Tuai Rumah nadai setipikit.
Menteri ba Opis Premier Sarawak ti mega Kaban Kunsil Nengeri (ADUN) Kakus, Dato Sri John Sikie Tayai madah, inisiatif nya beguna amat dikena mutar atur administrasyen ba renggat baruh kelimpah nentuka pengawa ngemudi komuniti rumah panjai lanchar enggau berurun agi.
“Taja pengawa nyiri Tuai Rumah baru bepun 1 Januari tu tadi netapka syarat abis nadai ngembuan Sijil Pelajaran Malaysia (SPM), sida ti bepeneleba ti kala gawa nyadi pegawai perintah agi ulih diperunding mangku pengawa nya,” ku iya.
Iya madah munyi nya ba Program ‘Meet the Leaders’ di Rumah Ado Kanyan, SPS Nanga Tada, ditu kena Hari Enam.
Nambah ke nya, Dato Sri John Sikie meri jamin pengawa nyiri Tuai Rumah ke bisi diatu enda diketu berindik ari pengawa milih tuai komuniti nya bepanggai ba jari peranak rumah panjai nya empu.
Iya mega nyemetak madah ke pangku pengawa pemadu tinggi dalam JKKK enda patut dipegai sama diri sebilik dikena nyeliah enggai ke belanja diatur chara ti salah.
Ngenang isu tanah, iya madah, surat nyukat tanah beguna amat nentuka tanah rumah panjai betul disukat kelimpah nyamin hak ngempu tanah mengkang ba komuniti bekaul.
Pia mega, iya besemaya deka negika elaun ungkup Tuai Rumah kelai ngaku pangku pengawa sida ngemudi komuniti.
Dato Sri John Sikie mega nyemetak madah ke pemesai guna kus latih ngagai Tuai Raban Bansa enggau Tuai Komuniti (KMKK) kelebih agi sida ti baru dichiri ke alai agih belanja ungkup latih ulih diambi nengah Projek Mit Pemansang Menua Pesisir (MRP).
Ba pekara sama, iya minta mensia mayuh ngemeran politik ti tuai runding enggau positif lalu enda dikeruga emosyen laban pengari rayat suah napi pemar lebuh bisi ulah bechiping entara komuniti.
Sama datai, Kaban Parlimen Hulu Rajang, Datuk Wilson Ugak Kumbong sereta ADUN Ngemah, Anyi Jana. - EDISI UKAS
