MARUDI: Peranak Rumah Jipun, Tanjung Upar Baru diatu ngasai ke jalai penyambung ti menyana agi berindik ari penembu jelatung baru sereta ngemanah jalai nuju genturung pendiau ti meri pemaik ngagai komuniti lokal.

Perengkaguna nya udah dipenyadi Sapit Menteri ba Opis Premier Sarawak (Pengereja Kasar, Imigresyen enggau Patau Projek) ti mega Kaban Kunsil Nengeri (ADUN) Mulu, Datuk Gerawat Gala ba sebengkah pengawa ti diatur ba Rumah Jipun, Tanjung Upar Baru, Marudi kena Hari Enam.

Ku Tuai Rumah Jipun Jantan, sebedau tu gaya jalai nuju rumah panjai nya mar ditengah kelebih agi maya musin ujan enggau penusah bah.

“Jalai lama belubang enggau belutak ngujungka entukar mar datai ngagai rumah panjai seraya meri pemar ngagai pejalai peranak ngereja aktiviti ninting hari.

“Pia mega, peranak mega napi pemar ngena pengkalan perau laban jelatung lama udah jai enggau enda likun dikena,” ku iya.

Taja pia, ku iya, pengawa ngaga jelatung baru sereta pengawa nyeruri jalai genturung diatu ngemuntang pejalai peranak sekali ke nengah jalai darat tauka sungai.

Nangkan nya, Datuk Gerawat madah ke projek ngaga perengkaguna nya dipejalai nengah agih belanja Program Transfomasyen Menua Pesisir (RTP) ungkup sitak Kunsil Nengeri (DUN) Mulu.

Ku iya, Perintah Sarawak naka ulih nentuka pemansang infrastruktur pemun baka jalai, jelatung enggau fasiliti bukai terus ditambah kelebih agi ba sitak menua pesisir enggau menua ulu.

“Nyadi pengari rayat, aku semampai meri perati ngagai peminta peranak lalu deka naka ulih mai mayuh agi pemansang dikena nyaga pengelantang komuniti,” ku iya.

Ba pengawa nya, iya mega ngemendar agih belanja sepenyampau RM67,000 nengah geran Projek Mit Pemansang Menua Pesisir (MRP) DUN Mulu ngagai komuniti Rumah Jipun.

Ari penyampau nya, RM50,000 diagih dikena nyeruri rumah panjai, RM3,000 ngagai empat ruang bilik dikena nyaup nembu ke rumah nya sereta RM5,000 ngagai Komiti Pemansang enggau Pengelikun Genturung Pendiau (JKKK) Rumah Jipun.

Bela datai, Pemancha Randie Bundan ti mega Tuai Komuniti Iban Pelilih Marudi, Penghulu Jimbau Ena ti nyadi Chairman Pemansang Poyut Lubok Nibong, tuai komuniti, tuai rumah sereta urung 80 peranak lokal. - EDISI UKAS