IGAN: Pengawa muka Jematan Igan kena 16 March meri pengaga ngagai peranak lokal ti ngasai ke perengkaguna nya nyadi penyungkak ubah besai ngemuntang pejalai mindah entara Igan, Matu enggau Daro.
Tebal agi, peranak meri terima kasih ngagai Perintah Sarawak laban ngemujur projek ti lama udah dianti seraya ngurangka pengawa bepanggai ngagai servis feri ti sebedau suah begunaka awak lama.
Siku peranak, Hartini Abdul Rahman, 56, madah, pemisi jematan nya deka nentuka pejalai peranak lanchar, jampat enggau lantang agi dibanding sebedau tu.
“Sebedau tu, pejalai begunaka timpuh ti lama laban meseti nganti feri tang diatu pejalai nya deka jampat enggau lanchar agi.
“Endang ngemuntang pengawa kami. Enti suba pejalai chukup lama tang nengah pemisi jematan tu, taga pejalai deka pandak agi.
“Aku deka meri terima kasih ngagai Perintah Sarawak laban ngemuntang pengidup peranak ba Igan,” ku iya maya dirandau Unit Komunikasi Awam Sarawak (UKAS).
Nangkan nya, Hashim Ismail, 60, madah kediri berasai lantang laban ulih betengahka jematan nya ila ti udah lama dikearap peranak dia.
“Aku chukup gaga laban bepuluh taun nganti, diatu juluk nya nyadi nyata.
“Diatu aku udah pinchin lalu beumur lebih 60 taun, tang agi ulih betengahka Jematan Igan.
“Alhamdulillah, seumur idup aku ulih meda enggau betengahka jematan tu. Terima kasih ngagai Perintah Sarawak laban ngemujur projek tu,” ku iya baru.
Ba penemu Mohd Nasri Sahari, 51, pengawa muka jematan nya endang awak ti lama udah dianti peranak Igan.
“Aku chukup gaga. Tu mih awak ti dianti peranak Igan pengelama berapa taun. Terima kasih Perintah Sarawak,” ku iya nyaut pandak.
Nambah ke nya, siku da peranak, Mohd Nizam Naim, 39, madah, projek jematan nya pemujur besai ngagai komuniti lokal ti sebedau tu bepanggai ngagai feri enggau timpuh pejalai ulih manggai sejam kelebih agi maya musin pengerami.
“Nyadi peranak Igan, kami berasai gaga laban juluk bisi jematan ti nyambung Igan ke Matu nyadi nyata.
“Kami meri terima kasih ngagai Perintah Sarawak diiring Premier Sarawak laban mendingka peminta rayat sereta ngamatka projek jematan tu,” terang iya.
Seraya, Nur Syaffilla Mohd Hamzah, 42, mega madah ke projek jematan nya nyadi perengkaguna ti meri pemaik besai ngagai pengidup besehari-sehari peranak ba Igan enggau ngelingi endur nya.
Ku iya, projek nya ukai semina ngemuntang pejalai tang mega meri pemaik besai ngagai pengidup besehari-sehari peranak ba Igan enggau ngelingi endur nya.
