LAWAS: Sepenyampau 1,289 raban begunaka bantu nyengkaum orang timpang pendiau (OKU), anak patu balu, indai tunggal enggau orang tuai ba Pelilih Lawas nerima pemeri serimbai Aidilfitri nengah Pengawa Nyua Pemeri Hari Raya Aidilfitri 2026/1447H diatur Gerempung Nyaga Pengelantang Islam Malaysia (PERKIM) pampang Lawas ti diatur ba Hotel Roxy, ditu kena Hari Enam.
Pengawa nya udah dipenyadi Sapit Premier Sarawak ti mega Menteri Pengeraja Asal enggau Pemansang Mengeri II sereta Menteri Dagang Antarabansa, Industri enggau Pengawa Meranak Puku Sarawak ti nyadi Kaban Kunsil Nengeri (ADUN) Bukit Sari, Datuk Amar Awang Tengah Ali Hasan bela nyuaka pemeri ngagai bala penerima.
Ku iya, inisiatif nyaga pengelantang baka nya mandangka penyiru komuniti mantu raban ti begunaka bantu kelebih agi nyerumba Hari Raya Aidilfitri.
“Arap ke pemeri ti disua nya ulih meri pengaga ngagai raban ti amat begunaka bantu maya ngintu Aidilfitri ke mega bulan penuh berekat sereta ngingatka kitai senentang pemesai reti kasih sayau enggau begulai dalam komuniti,” ku iya.
Iya madah, pemesai reti besaup enggau semangat siru entara komuniti meseti terus ditarak nentuka pengaga ulih diasai ke serap komuniti.
Nambah ke nya, iya nyemetak madah ke Perintah Sarawak keran nentuka pemansang nengeri mansang seraris enggau pengawa nyungkak ekonomi sereta pengelantang rayat nengah mayuh inisiatif ti meri pemaik ngagai komuniti.
Nangkan nya, Chairperson PERKIM Pampang Lawas, Dato Dayang Morliah Datuk Awang Daud mega madah, program nya ukai semina aktiviti ninting taun tang mega nyadi pelasar beguna narak semangat nyaga pengelantang enggau siru ke komuniti.
“Kami chukup ngenang penyiru sida ti gerah jari ti semampai nyukung pengawa nyaga pengelantang PERKIM Lawas seraya nyadi peransang ngatur mayuh agi program nyaga pengelantang dudi hari,” ku iya.
Ba pengawa nya, sepenyampau 1,289 penerima ari empat kategori nerima pemeri iya nya 171 anak patu balu, 186 indai tunggal, 150 nembiak mit OKU enggau 782 orang tuai.
Pengawa nya mega nerima sukung ari sekeda raban ti gerah jari nyengkaum Dato Mohamad Safri Datuk Abdillah, Empayar Setia Sdn. Bhd., Lee Chin Teck, Tecktonic & Sons Holdings Sdn. Bhd., Emart Holding, Laras Jaya, Golden Throne, Pusat Khidmat N.82 Lawas, LAKIL, PERKIM sereta Empore Sdn. Bhd.
Bela datai, Kaban Parlimen Lawas, Dato Henry Sum Agong, Residen Bagi Menua Limbang, Yunus Tambi, Pegawai Pelilih Lawas, Ladin Atok, tuai opis sereta tuai komuniti lokal. - EDISI UKAS
