BETONG: Pengawa bejalaika mayuh projek nengah Agensi Pemansang Bagi Menua Betong (BDDA) terus mai buah pemansang ngagai peranak menua pesisir nyengkaum ba Layar Ili ti diatur nerima pemaik nengah pejalai projek infrastruktur, pengerai enggau pemansang sosioekonomi.
Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu madah, entara projek ti benung enggau deka terus dipejalai iya nya nyeruri Jalai Tanjung Assam nyentuk Stambak Ili, kelimpah projek nyeruri Klinik Pengerai Mid Layar sereta perambu ngaga Palan Akademi Nembiak dia.
Ku iya, Renggat Kedua BDDA diatu meri perati ngagai pemansang sosioekonomi enggau mayuh program deka dipejalai nyengkaum projek nupi manuk ti udah belabuh dipejalai ngaul raban diselinting dia.
“Ba rumah panjai, semua orang bisi pangku pengawa. Kitai meseti sama nyukung pangan diri, nyukung tuai rumah, nyukung Komiti Pemansang enggau Pengelikun Genturung Pendiau (JKKK), nyukung penghulu enggau tuai komuniti.
“Nengah kerejasama baka tu mih kitai ulih nentuka pemansang lanchar,” ku iya.
Rentap madah munyi nya ba Pengerami Tuai Ngundang Rayat ti diatur ba Rumah Barau Ak Unji, Benggang, Betong kena Hari Minggu.
Iya ti mega Kaban Kunsil Nengeri (ADUN) Layar nyemetak madah ke pemujur pemansang menua pesisir ukai semina bepanggai ngagai pejalai projek fizikal tang mega begunaka sukung tegut komuniti ngagai tuai renggat baruh.
Ku iya, genap renggat tuai ba komuniti rumah panjai, bepun ari Tuai Bilik (KIR), tuai rumah, penghulu, pemancha, temenggung nyentuk renggat opis pelilih enggau pengari rayat mangku pengawa besai nyaga pengelantang komuniti enggau nentuka kuing tuju pemansang lokal.
Ngenang bantu perintah, Datuk Gerald ngingatka mensia mayuh ngena bantu baka Bantu Barang Diguna Pemun Sarawak (SKAS) ti diagih nengah aplikasyen S Pay Global.
Ku iya, agi tubah komuniti ti apin landik ngena kereban digital nya lalu nya kebuah tuai komuniti enggau tuai raban bansa dikearap ulih mantu nentuka nadai individu kena tinggal ari nerima bantu nya.
Berebak enggau nya, iya mega ngingatka mensia mayuh ngena bantu ti diterima nitih pematut maya napi belanja idup ti niki diatu.
Iya mega nyemetak madah ke pemesai guna pelajar ba rebak biak kelebih agi nengah inisiatif pelajar tinggi pechuma ti dipejalai Perintah Sarawak.
Ku iya, peluang nya meseti dikena nembiak menua pesisir enggau manah lalu apai indai mega meseti meri sukung ngambi sida ulih bebendar belajar ungkup pengidup ti menyana agi.
Nangkan nya, Kaban Parlimen Betong, Dato Dr Richard Rapu madah, perintah udah bejalaika mayuh inisiatif dikena mantu rayat mutar belanja idup niki nyengkaum program BUDI MADANI RON95, Sumbangan Tunai Rahmah (STR), Sumbangan Asas Rahmah (SARA) sereta Program Rahmah lalu Perintah Sarawak mega nyendia bantu nengah SKAS.
Ngenang pekara bukai, ku iya, perintah udah bejalaika mayuh inisiatif dikena mantu rayat mutar belanja idup niki nyengkaum program BUDI MADANI RON95, Sumbangan Tunai Rahmah (STR), Sumbangan Asas Rahmah (SARA) sereta Program Rahmah lalu Perintah Sarawak mega nyendia bantu nengah SKAS.
Ba pengawa nya, bisi mega diatur pengawa nyua setipikit ngenang jasa ngagai Penghulu George Gerie ti udah pinchin kelimpah setipikit chiri ngagai Sebastian Kadam Randy nyadi Penghulu baru ungkup sitak Layar Ili.
Pia mega, setipikit chiri bela disua ngagai tuai rumah ti baru dichiri enggau dichiri baru ungkup 19 rumah panjai dia.
Sama datai, Pegawai Pelilih Betong Laga Kueh, Penguasa Tanah enggau Survei Bagi Menua Betong Moris Nayup, Pegawai Betanam Betupi Bagi Menua Betong Leo Toni, Pemancha Komuniti Iban Pelilih Betong Norman Ngumbang, Penghulu Sitak Layar Ili Sebastian Kadam Randy sereta Tuai Rumah Benggang Barau Unji. - EDISI UKAS
