Program Juh Berambeh Sungkey Di Padang Merdeka Matak Beribu Pengusung
KUCHING: Pengerichah enggau semangat segulai sejalai berasai endar lebuh beribu pengusung ari pupu bansa enggau tirai juru begelumu ba Padang Merdeka ngulu Program Juh Berambeh Sungkey ti diatu datai ba taun keempat diatur.
Program buka puasa bebala mayuh nya nyadi pelasar raban orang Islam bukai puasa, sereta matak pengusung bukai ari pupu raban bansa ti datai ngerami Ramadan enggau ngerapit kaul begulai.
Menteri Dagang Temuai, Industri Kreatif enggau Seni Pemerindang ti mega Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, pemanah timbal diterima ngayanka sida ti datai mayuh agi ari taun ke udah.
“Taun nyin tadi endang mayuh, aku ulih meda ari taun keterubah, penyampau bala ti datai majak mayuh lalu tu ukai semina sida ti deka buka puasa aja, tang bala bukai ari raban bansa bukai,” ku iya lebuh dirandau ba program nya, Hari Enam.
Iya madah, ari rikod taun nyin tadi ti ngerikod 5,000 pengusung datai, penyampau nya disadang nambah taun tu, umba gaya hari ti manah.
Iya mega madah, program nya deka ditandu taun baru enggau richah agi, kelebih agi Hari Raya Aidilfitri disadang diintu nyau deka seretai enggau Taun Baru China.
Berebak enggau nya, iya meri terima kasih ngagai semua raban ti sama besaup ngemujurka program nya nyengkaum agensi perintah enggau raban nyaga pengelikun baka Kaunsil Mengeri Kuching Utara (DBKU) enggau Polis Diraja Malaysia (PDRM).
“InsyaAllah taun baru program tu deka ditandu. Pelaba aku richah agi.
“Aku deka meri terima kasih ngagai semua pengusung enggau agensi ti bekerejasama ngemujurka program tu,” ku iya.
Entara aktiviti ti diatur sekumbang program nya nyengkaum simbolik nyadung bubur lambuk, nyua pemeri ngagai raban asnaf, chabut tikit benasip enggau meda montaj.
Program Juh Berambeh Sungkei @ Kuching 2026 ti diatur Kelab Nembiak Siru Mengeri Kuching enggau sukung Opis Menteri Nembiak, Lumba enggau Pemansang Orang Dagang Sarawak.-EDISI UKAS
Pemberita: Ezzah Syafiqah
Gambar: Ezzah Syafiqah, George S. Embie
