BINTANGOR: Hari Tuai-Tuai Rumah enggau Aum Besai Serakup Tuai-Tuai Rumah Pelilih Meradong penggal 2024–2025 udah diatur di Hee Bin Leau Restaurant, ditu Hari Enam, ngempuru bala Tuai Rumah enggau bala tuai komuniti di pelilih nya.

Program nya richah enggau penatai Kaban Kunsil Nengeri (ADUN) Meradong, Datuk Ding Kuong Hiing.

Lebuh bejaku, iya madah ke Tuai Rumah ngesan pangku pengawa besai nyadi tuai komuniti enggau jematan entara rayat enggau perintah nentuka pengelikun, penegap enggau pemansang ba sitak nya terus dijaga.

Kelimpah ari nya, Datuk Ding juga mega meransang bala Tuai Rumah seruran mekih adat asal enggau nilai budaya komuniti, sereta nitih segang pemansang kemaya hari nyengkaum ba sukut pemansang, pelajar enggau pendigitalan komuniti.

Berebak enggau nya, iya bisi ngemendarka geran khas Projek Mit Pemansang Menua Pesisir (MRP) penyampau RM5,000 ngagai Serakup Tuai-Tuai Rumah Pelilih Meradong dikena nyukung aktiviti ninting taun serakup sepanjai taun 2026.-EDISI UKAS