IGAN: Perintah Sarawak seruran naka ulih negap pemansang infrastruktur ungkup pengelantang rayat kelebih agi ba menua pesisir nengah projek ngaga Jematan Batang Igan ti udah tembu menyana.

Sapit Premier ti mega Menteri Insfrastruktur enggau Pemansang Penyangkai Kapal Sarawak, Datuk Amar Douglas Uggah Embas madah, infrastruktur nya mega ngemuntangka jalai penyambung enggau ngeranchak pemansang ekonomi, kelebih agi ba kandang menua pesisir.

“Inisiatif tu ulih dipeda ari ngaga Jematan Batang Igan ti diatu ulih ditengah mensia mayuh, kelai siti da pemujur besai dijapai ba agenda pemansang nengeri.

“Sehari tu sejarah diturai ungkup peranak di Bagi Menua Mukah, kelebih agi ba sitak Igan lebuh jematan tu ulih ditengah mensia mayuh,” ku iya.

Iya nyebut jaku nya lebuh dirandau pemberita pengudah bejadi pengawa Ngelanchar Tumu Jematan Batang Igan, Hari Satu.

Iya madah, servis feri Batang Igan mega diketu pengudah 30 taun nyadi penyambung lalu nyadi nyadi sejarah ngagai peranak dia.

Nambah ke nya, ku iya, jematan sepanjai 1.439 kilometer beungkus RM285.5 juta nya ngayanka Perintah Gabungan Parti Sarawak (GPS) ngamatka semaya ngaga lebih 20 jematan di selampur nengeri.

“Taun tu baka taun kitai ngetau asil, lebuh sekeda projek jematan di Sarawak disadang tembu lalu ulih ditengah mensia mayuh.

“Pemujur projek tu mandangka Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg keran ngamatka semaya ngaga lebih 20 jematan di Sarawak," terang iya.

Berebak enggau nya, jematan ti dipelanja ngena belanja perintah nengeri pengudah tiga projek jematan nyengkaum Jematan Batang Igan kala dikinsil Perintah Besai ba taun 2018.

“Aku pechaya, taun tu servis feri ari Kuching ke Miri deka diketu magang pengudah semua projek jematan tembu.

“Pengawa tu mega seriris enggau Strategi Pemansang Pengudah COVID-19 (PCDS) 2030 ti nyelinting Sarawak nyapai status nengeri bepenatai pemisi tinggi manggai 2030,” ku iya.

Tembu pengawa nya, Datuk Amar Douglas Uggah mega bejadi Program Pengelikun Jalai Alun enggau pengawa nyadung 'goodies' ngagai penguna jalai alun.

Sama datai, Sapit ba Opis Premier Sarawak (Pekara Korporat, Pemadah enggau UKAS) Datuk Abdullah Saidol, Sapit Menteri ba Opis Premier (Integriti & Ombudsman) Dato' Murshid Diraja Dr Juanda Jaya, Kaban Parlimen Igan Ahmad Johnie Zawawi, Kaban Parlimen Tanjung Manis Dato Ir Yusuf Abdul Wahab, Direktor Opis Kereja Raya Sarawak Datu Dr. Cassidy Morris sereta bala bukai. - EDISI UKAS