KUCHING: Sarawak minta pemutus bekaul nginsur tatak umur enggau ubah atur kuota atlit timpang pendiau (OKU) diserenih baru nentuka pemansang lumba raban nya ulih ditampung inklusif enggau nemban.

Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah madah, uda pemutus digaga ba Aum Kaunsil Supreme Kaunsil Lumba Menua (MSN) bulan Januari nyin tadi deka meri empas besai ngagai pemansang lumba OKU di nengeri tu.

Ku iya, pemutus nya nginsur tatak umur atlit ari 45 ngagai 40 taun, kelimpah ubah atur kuota ngambi achara ari minimum empat atlit ngari ke dua nengeri ngagai empat atlet ari tiga nengeri nentuka pekit nya ulih diatur.

Ku iya, Sarawak mantah nginsur tatak umur nya laban diperati enda setipak enggau utai diguna kebendar ba pemansang atlit OKU ti suah agi bebida ari atlit normal.

“Ba renggat antarabansa, nadai tatak umur ditetap ungkup atlit OKU. Sida empu nemu kemaya deka nyurutka diri.

“Raban OKU mega tebal agi ari ‘late bloomers’ tauka lubah mansang. Nya alai, kitai enda patut natak peluang sida terus regas enggau mansang ba pengawa lumba enggau main,” ku iya.

Iya nyebut pekara nya ba aum media pengudah nerima penemuai basa Sapit Menteri Nembiak enggau Lumba Mordi Bimol di opis iya ditu, Hari Satu.

Lebuh berandau, Dato Sri Fatimah mega bekunsi pemansang lumba OKU di Sarawak nyengkaum sejarah, penyulut enggau bansa lumba dikuasa opis menteti iya.

Kelimpah ari lumba para, ku iya, Sarawak mega chakah ngemansangka Special Olympics lalu deka nyadi tuai rumah Special Olympics National Games di Bintulu bulan April tu.

Iya madah, Sarawak sebedau tu kala nyadi tuai rumah pekit lumba atlit bengal kelimpah terus meri perati ngagai pemansang lumba ungkup kategori buta enggau atlit tasal.

Iya nyemetak madah, lumba ukai semina kelang ngiga penau, tang nyadi kelang besai negap raban OKU lalu meri pengandal sereta peransang ngagai sida ngembuan idup ti menyana agi.

Seraya Mordi Bimol madah, tuju penemuai basa nya negap kerejasama strategik entara Opis Menteri Nembiak enggau Lumba begulai enggau Opis Menteri Pemansang Indu, Nembiak Mit enggau Pengelantang Komuniti Sarawak kelebih agi ba pemansang lumba para enggau OKU.

Ku iya, randau nya mega meri awak berandauka isu bekaul nyengkaum tatak umur atlit para sereta minta sanding penemu ari opis menteri nengeri, jurulatih enggau raban bisi kaul besai.

“Aku datai sehari tu deka mending, mereti ke enggau mai isu tu ngagai renggat nangkan tu.

“Nyadi anak Sarawak, udah tanggungpengawa aku mai pekara tu ngambi diberi perati enggau dipuntang,” ku iya.

Sama datai, Sapit Menteri Pemansang Pengelantang Komuniti Sarawak Datuk Mohammad Razi Sitam, Direktor Opis Pengintu Pengelantang Mensia Mayuh Sarawak Semawi Mohamad, Direktor Opis Nembiak enggau Lumba Sarawak Lamat Nyalau serrta Sapit Sekretari Mendam Opis Menteri Nembiak, Lumba enggau Pemansang Orang Dagang Sarawak Dolhadi Mazuki.-EDISI UKAS

Pemberita: Nur Nabilla
Gambar: Ibanez Jeffery Guang