KUCHING: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg nerima surat chiri baru Pro Canselor Universiti Malaysia Sarawak (UNIMAS) di Kompleks Satria Pertiwi kena Hari Dua.

Chiri ungkup timpuh 15 Mac 2026 nyentuk 14 Mac 2029 nya udah dipesetuju Yang di-Pertua Negeri Sarawak ti nyadi Canselor UNIMAS, lalu kelai keempat kali iya udah dichiri kenyau ari 2017.

Surat chiri baru nya disua ba siti penemuai basa deligit UNIMAS betuai ke Chairman Kaunsil Direktor, Tan Sri Datuk Seri Panglima Sulong Matjeraie.

Berebak enggau nya, UNIMAS mega madah ngambi 40 nembiak nyadi kohort keterubah Fakulti Undang-Undang ti baru ditumbuh berengkah September taun tu enggau perati diberi ngagai anak Sarawak.

Mandal Canselor UNIMAS, Prof Dr Ahmad Hata Rasit madah, tuju fakulti nya ditumbuh dikena negap bidang undang-undang di nengeri tu, kelebih agi ngaul Customary Law, Sempekat Malaysia 1963 (MA63), sereta pekara pemansang ekonomi Sarawak nyengkaum garis entara menua ba nengeri enggau antarabansa.

“Bisi tiga pugu besai deka dikemansang iya nya pansik bekaul Customary Law, numbuh palan pansik adat enggau sejarah, sereta nyerungkai bidang undang-undang ngena teknologi antarabansa nyengkaum sistem nangkap karbon.

“Fakulti tu mega deka ngatur program ti engkeman enggau peminta kemaya hari sereta seriris enggau agenda pemansang Sarawak,” ku iya ngagai pemberita pengudah tembu penemuai basa ngagai Premier Sarawak.

Nambah ke nya, raban pengatur pengawa universiti mega mantaika penerang pemadu baru enggau penyulut UNIMAS ba akademik, pansik enggau pemansang institusyen.

Sama nemuai, Dekan Fakulti Undang-Undang, Johan Shamsudin Sabaruddin, Chairman Kaunsil Direktor UNIMAS, Sulong Matjeraie, sereta Sapit Mandal Canselor (Akademik), Fitri Suraya Mohamad Hapni Joblie.-EDISI UKAS