KUCHING: Perintah Sarawak negap rentayan sukung rama nengah pengawa numbuh Community Social Support Centre (CSSC) nyadi palan mantu raban umang nyengkaum sida ti dijamah, seranta mengeri enggau orang ti bisi penanggul rama.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, inisiatif nya ditumbuh pengudah nemu mayuh gerempung ukai dikuasa perintah (NGO) nadai premis entap endur bejalaika aktiviti ngintu pengelantang.
Ku iya, CSSC meri peluang nadai bebayar ngagai NGO, agensi enggau opis menteri ngatur bemacham program advokasi, intervensi, kaunseling sereta pemansang kapasiti komuniti.
“Palan tu nyadi nalan berandau enggau ngatur aktiviti begulai, lalu negap pengawa nambah penemu komuniti sereta mantu orang ti betapi enggau bemacham penanggul rama,” ku iya ba aum media, kena Hari Dua.
Iya madah, CSSC disikap perengkaguna baka bilik kaunseling, endur baum enggau latih dikena nyukung program dipejalai ngaul indu, orang tuai, nembiak enggau orang timpang pendiau.
“Dikena mutar penanggul seranta mengeri, CSSC mega bisi dapur komuniti enggau kerejasama Society for Coaching Urban Poor (SCOOP) ti nyendiaka pemakai nadai bebauar ngagai raban beguna pemakai ninting hari.
“Inisiatif tu mega nerima sukung ari pemeri mensia mayuh enggau raban korporat, lalu nya ngasuh pengawa nyendiaka pemakai ukai semina siti pemakai dinah ninting hari aja, tang kena makai pagi ngagai raban diselinting,” ku iya.
Naka diatu, CSSC Kuching ngerikod 44 penerima bantu pemakai ninting hari, 50 penerima bantu pemakai, 27 orang diau ngenduh, kelimpah mutar 653 kes sosial sereta bejalaika 760 program ngaul advokasi, nagang, kaunseling sereta pemansang kapasiti.
Ngenang pekara bukai, iya madah ke CSSC di Sibu disadang berengkah dikena April tu, dientudi Bintulu bulan Mei, ke alai bisi tiga palan beoperasyen taun tu nyengkaum di Kuching.-EDISI UKAS
